Denboraldiko lehen berdela nahikoa merke saldu da bentalekuan
Asteon, berdel kanpainako lehen berdel aleak porturatu dira Ondarroan. Martitzenean [martxoak 3] sartu ziren denboraldiko lehen kiloak; denetara 96.000 kilo porturatu ziren Egidazu kaian.
Marinelek adierazi dutenez, gainera, nahikoa hurre harrapatu dute berdela, Lekeitio parean; kostaldetik hamar bat miliatara. Arrantzaleak pozik agertu dira berdel denboraldiko lehen arrantzuekin, baina bi kofradiako arduradunek azpimarratu dutenez, «nahikoa merke» saldu da berdela; 60 zentimo inguruan. «Ezkabietan etorri den arraina saldu da merkeena, eta kaxa txikietan ekarri dutena, ostera, zer edo zer garestiago saldu da».
Antxoa ere bai
Berdelaz gain, antxoa ale batzuk ere harrapatu dituzte asteon. Eguaztenean [martxoak 4], 1.000 kaxa antxoa sartu ziren Ondarroan, eta «prezio ederra» egin zuela nabarmendu dute Kalare Deuna kofradiako ordezkariek. 4 eta 3,5 euro artean saldu zen bentalekuan.
Hiru baxurako ontzik arrantzatu zuten antxoa, Santoña (Kantabria) parean. Tamaina politekoa izan zen gainera, kiloko 44-46 alekoa. Arrantzaleen esanetan, «bidezko prezioetan» saldu zuten. «Egunkari batzuetan antxoak prezio eskasa egin zuela argitaratu baldin bada ere, hori ez da horrela. Ez gaude bat ere ados baieztapen horregaz», kexatu dira.
Gaur [martxoak 5], ostera, ontzi asko portuan lotuta geratu dira, eguraldi txarra tarteko. Amuko ontziak atera dira bakarrik. Mutrikuko amuko itsasontzi bat eta Ondarroako hiru itsasoratu dira.
ASTEKO ARRAIN BENTA
Martitzena
‘Kalamua bi’ berdela deskargatzen martitzenean
- Berdela. 96.000 kilo: 62 zentimo, bataz beste.
- Boba. 6.100 kilo: 53 zentimo, bataz beste.
- Txitxarro zuria. 9.500 kilo: 2,05 euro, bataz beste.
- Antxoa. 8.400 kilo: 3,58 euro, bataz beste.
- Berdela. 80.000 kilo: 58 zentimo, bataz beste.
- Boba. 1.400 kilo: 37 zentimo, bataz beste
Erlazionatutako edukiaBerdel kosterako lehen aleak deskargatu dituzte Ondarroako portuan
