Euskal Jaia arrakastaz ospatu dute lekeitiarrek, beste behin ere
«Jende asko bildu zuen jaiak eta eguraldi onagaz, ekintza guzti-guztiak egin ahal izan genituen», azaldu dute. Domeka izanda, Gure Esku Dagoren ekitaldia ere gogoan izan zuten antolatzaileek: «Oihal zati bat atera genuen, guk ere ekitaldiagaz bat egiten dugula adierazteko».
Ospakizuna domekan izan bazen ere, antolatzaileek gogotik lan egiten dute aurretik. Horrela ba, zapatua ere prestaketa lanetarako eguna izan zuten antolatzaileek. «Zapatuan gurdia jantzi genuen».
Behin egun handia ailegatuta, eguraldi onagaz ekintza guztiak ondo joan zirela esan dute antolatzeileek. «Aurreikuspenak bete egin ziren; domekarako prestatuta genuen programa osorik bete egin genuen».
12:00etan hasi ziren ekintzak, Euskal Ezkontzagaz, joaldunekin, dantzariekin eta txistulariekin.
Eta arratsaldeko ekintzak ere «punta-puntakoak» izan zirela gaineratu dute. «Alurr dantza taldeko kideak gazteak dira baina oso ikuskizun ona eman zuten».
Oihalak, jaiaren barruan
Gure Esku Dagok egun horretarako San Mamesera joateko hitzordua jarrita bazeukan ere, plaza jendez bete zela esan dute. «Gure Esku Dagoren ekitaldiekin nola edo hala bat egiteko, oihal zati bat atera genuen eta ekintzari gure atxikimendua eman genion».
Eguna hain izan zen zoragarria ze, herritarrek zoriongu egin zituztela antolatzaileak. «Zorion mezu asko jaso ditugu; pozgarria da».
Baina berezitasunik ere izan zen. Izan ere, gurdiak (bere osotasunean) ateratzen zuen soinua grabatzera etorri ziren. «Dirudienez, grabatzera etorri zirenek esanda, horrelako gurdirik ez dute inguruotan aurkitu, eta Internet bidez jakin zuten Lekeition bagenuela. Gurdiaren soinua grabatuta, daukagun altxorra ondo-ondo gordetzeko esan ziguten: mundu mailan bakarrenetakoa dela esan ziguten».
Aurtengo eginda, orain, antolatzaileak datorren urtera begira jarri dira. Izan ere, datorren urtean 40. urteurrena ospatuko du Euskal Jaiak. «Horretan zer edo zer berezia egin nahi dugu eta aurtengo egin ostean, orain, prestaketa lanetan murgilduko gara; ondo-ondo antolatu behar dugu urteurren borobila».
Euskal ezkontza. Argazkia: Eneko Zuberogoitia
Euskal Jaian parte hartu zuten herritarrak, udaletxe aurrean. Argazkia: Eneko Zuberogoitia
Dantza saioa, plazan. Argazkia: Eneko Zuberogoitia
