Askatasun sexuala "landu beharreko gaia" dela dio Potxuak Martxanek
Askatasun Sexualaren Nazioarteko Eguna aldarrikapenez beteta ailegatu da Lea-Artibai eta Mutrikura. Lekeitioko Potxuak Martxan taldeak, esaterako, askatasun sexuala «landu egin behar den gai bat» dela esan du.
Joan den eguenean hasi ziren ekintzak Lekeition. «Kitzikan sexu askapenerako gazte antolamenduaren aurkezpena oso ondo egon zen. Interesgarria izan zen eta eztabaidarako gaiak atera ziren», azaldu dute Potxuak Martxaneko kideek. Dena dela, aurkezpenean ez zela jendetza bildu azaldu dute. «Aurten eduki aldetik landu nahi izan dugu nazioarteko eguna. Eta ikusita ekintzetan parte hartu dutenak ez direla asko-asko ere izan, gaia ez dela oso agerikoa ikusten da».
Aurkezpen hori egiteaz gain, Luna de Brasil pelikularen emanaldiak ere eskaini zituzten, Ikusgarrin, atzora arte. Bai eta aldarrikapen pankarta ipini ere.
Azken urteetan, Lekeitioko Potxuak Martxaneko kideek modu bateko edo besteko ekintzak egin izan dituzte nazioarteko egun horren harira. Eta aurrera begira ere bide beretik jarraitzeko asmoa daukatela aurreratu dute. «Eginbehar horretan jarraituko dugu datozen urteetan ere».
Ondarroan ere bai
Potxuak Martxanek egin modura, Ondarroako Uxu emakumeen taldeak ere beti egiten du zer edo zer naziortzeko egunaren inguruan. Aurten, pankarta bat (Zubi Zaharraren inguruan) eta informazio panelak (Alamedan) ipini zituzten.
Bateko eta besteko aldarrikapenetan, baina, gaia bistaratzeaz gain, azkenaldiko erasoak salatu eta guztientzat errespetua eskatu zuten, aho batez. «Askok ez dute errespetatzen aniztasuna».
Kitzikaneko kideak, azalpenak ematen. Argazkiak: Potxuak Martxan
Kitzikanen aurkezpena, Azkuen. Argazkiak: Potxuak Martxan.
