Emakumeak Mutrikun Abian taldeak lokala inauguratuko du barikuan
Mutrikuko emakumeen taldeak Emakumeen Mundu Martxaren etorrera aprobetxatu nahi izan du lokala inauguratzeko. Ekintza 18:00etan hasiko da barikuan [urriak 2], San Agustin kaleko 10. zenbakian (Zubiaram tabernaren aldamenean). “Aurrerantzean hori izango da topalekua. Gure nahia, jatorri, izaera, ideia eta adin ezberdinetako emakumeak bertan biltzea da, eta etorkizunean zerbait aberatsa sortzea”. Toki finko baten beharra zutela azaldu dute eta orain, lortu dutela, hitzaldiak, tailerrak eta bestelako ekintzak egingo dituzte bertan.
Izan ere, orain arte, EMAko kideak Luardo Etxean batzen ziren. Lokalarekin pozik daudela diote. “Aurrerantzean herriko emakume guztiek bertan batzeko aukera izango dute”.
50 metro koadro inguru ditu lokalak. “Lanean aritzeko toki finko batean beharrean geunden, eta pozik gaude. Hainbat ekimen eta dinamika ipini nahi ditugu martxan, eta horiek guztiak landu eta mamitzeko toki aproposa izango da. Herrian, egia esan, lan asko dago egiteko. Hainbat gai lantzen joango gara, herrian suertatzen diren beharrizanei erantzun bat eman ahal izateko”.
Lokala inauguratzeaz gain, Emakumeen Mundu Martxaren inguruko informazioa ere emango dute barikuan.
Emakumeak Abian Mutrikun taldeko kideak, lokal berrian.
