Lea-Artibai Amankomunazgoak "herrien arteko elkarlana" bultzatuko duela esan du EH Bilduk
Koalizioko kideek jakitera eman dutenez, EH Bilduren izaera da gizarte eragileekin eta herritarren parte hartzearekin elkarlanean aritzea. “Ondorioz, Amankomunazgoaren kasuan, herrien arteko harremanak sendotzeko apustua egigno dugu, programa bateratuen alde lan eginez”.
Aurretik, Lea-Artibai Amankomunazgoa EAJren gidaritzan egon denean, koalizioak “programa sendoak” landu zituela jakitera eman dute. “Horrez gain, denei egin genien gonbitea”. Bide horretatik, gizarte zerbitzuetan “urratsak emateko gai izan” zirela azaldu dute. Eta oraingoan ere, jeltzaleei zein talde independienteei euren ekarpenak egiteko eskua luzatu dietela diote. “Hori da eskualdearen alde egiteko bide zintzoena eta seguruena”.
EAJk joan den astean esandakoari erantzun nahian, koalizioko kideek esan dute eurentzako batzordeak direla gai guztiak lantzeko “gune naturalak”. Bide horretatik, abenduan Amankomunazgoan egindako osoko bilkuran ondokoa proposatu zutela jakitera eman dute: “Amankomunazgoko egituretan ordezkari bakarra duten herrientzat, oposizioan daukaten alderdietako ordezkariei ere batzordeetan parte hartzeko aukera ematea”.
EH Bilduko ordezkarientzako Lea-Artibai Amankomunazgoak “asko egin dezake herrien alde: erakundeen aurrean, herri bakoitzera gehiago hurbilduta, zernbitzuak hobetuz…”. Hori guztia egiteko, baina, lehendakariak, alderdi batekoa zein bestekoa izan, dedikazio osoa behar duela diote. “Dedikazioaren alorrean EAJren oztopoa eduki badugu ere, aurrera egin dugu, benetan balio duena baita herritarrentzat lanean jartzea, denborarik galdu gabe”.
Bide batez, legealdian landuko dituzte helburu nagusiak zeintzuk izango diren jakitera eman dute: batzordeak martxan ipini, programa “onuragarriak” adostu eta aurrera eraman, herrien arteko giro ona eta lankidetzakoa sustatu, Lea Ibarrarekin zubiak eraiki, udalen zerbitzuen arteko sarea sendotu, herriengana hurbiltzeko bideak bilatu eta garapen sozio-ekonomikoa ahal den eta eremu gehienetatik lantzeko aukerak jorratu.
