I. Bertso Kopla Txapelketa lehiatuko da Galarrenan
Poto Bertso Eskolak antolatuta, I. Bertso Kopla Txapelketa egongo da, bihar [maiatzak 6] gauean, Galarrenan. Hamar bertsolari ariko dira kantuan, euretatik lau herrikoak izango dira.
Aissa Intxausti, Aitor Ruiz, Aitzol Goitia eta Iraitz Bilbao bertsolari lekeitiarrak, Ispasterko Gorka Madarieta, Etxebarriako Lander Ibarluzea Aitxulua, Jone Larrinaga mungiarra, Txaber Altube Abadiñokoa, Malen Amenabar erdi larrabetzuar eta erdi azpeitiarra eta Peru Vidal algortarra aterako dira Galarrenako agertokira. 22:00etan hasiko dira bertsotan, zein baino zein hobeto, txapela eskuratzeko.
Bertso Kopla Txapelketa, baina, ez da izango asteburu honetan Galarrenan lehiatuko den txapelketa bakarra. Abian da bai eta ere, Mus Txapelketa.
Denetara hiru asteburutan jokatuko da karta lehiaketa, eta asteburu hau izango da lehenengoa.
Partidak, zapatu arratsaldeetan jokatuko dira, 16:30etik aurrera, zortzi erregeetara.
Egitarau zabala
Herritar guztiei zuzenduta, era askotako aisialdi eta kultur ekimenez osatutako egitaraua eskaintzen ari da Galarrena, otsailetik. Egitarau zabal horregaz Galarrena taberna bat baino askoz gehiago dela berretsi nahi du Galarrena Elkarteak, eta herritarrentzat ateak zabal zabalik edukitzeaz gain, herriari ekarpen kultural, sozial zein politikoa egitea dituela helburu.
Aissa Intxausti Aburruza bertsolari lekeitiarra.
