Lekeitioko udal gobernuak gizarte zerbitzuak murriztu izana salatu du EH Bilduk
Lekeitioko EAJ-k gizarte zerbitzu batzuk murriztu dituela salatu nahi izan du koalizioak. “Inorekin adostu edo landu gabe hartu du erabakia. Ez du Lekeitioko EH Bildurekin ez eta Lea-Artibaiko EAJrekin berba egin”. Oro har, Lekeitioko EAJk “beraien interesen mesedetan eta herritarren beharrizanen gainetik” erabakiak hartu izana salatu du EH Bilduk.
Koalizioko ordezkariek zehaztu dutenez, EAJk ondoko zerbitzuak murriztu ditu: Sartu Zabaltzen gizarteratze tailerrak, gurasoentzako formazioa, eta gizarteratzeko programen baitan egiten diren GR eta PR-ren homologazioa eta bide zidorren garbiketa. “Beste zerbitzu batzuk ere kentzeko prest zeuden, baina hitzarmen ezberdinen bitartez lotuta zeudenez, ezin izan dute. Dena dela, 2017an, hitzarmenak bukatzen direnean, ez dakigu nolako proposamenekin etorriko diren. Batez ere, Lekeitioko eta Amankomunazgoko aurrekontuetan ze bide hartu duten ikusita”.
Izan ere, Lea-Artibai Amankomunazgoak aurrekontuak onartu ziren duela bi aste. Horretan, Lekeitioko Udalak egindako proposamenari ezezkoa eman zion EH Bilduk. “Herrian murrizketak egiteaz gain, Amankomunazgora eramandako proposamenak gainerako herriei ere eragiten die eta”.
Amankomunazgoko aurrekontuak onartzeko herri ezberdinek “ahalegin handiak” egin dituztela esan dute. “Bizkaiko Foru Aldundiak egindako murrizketen erruz, udalak ez daude egoera ekonomikorik onenean. Baina hau ez da Lekeitioko EAJren udal gobernuaren kasua”.
Markina-Xemeinen dagoen Lea-Artibai Amankomunazgoa.
