Ispasterrek herri galdeketa egin zuen egun berean edo bezperan, Lea-Artibai eta Mutrikuko Gure Esku Dago taldeek ekintza asko eta asko egin zituzten. Gehienak Adierazpen Egunak izan ziren, eta talde ezberdinen parte hartzearekin, herriak kolorez jantzi zituzten.
Aulestin, esaterako, Santa Eufemin egin zuten ekintza, zapatuan [ekainak 4]. Ermitara arteko bidea giza kate bategaz lotu zuten. Ostean, talde argazkia atera zuten zelaian.
Markina-Xemeinen, ostera, adierazpena irakurri eta Erabakitze Eskubidea gauzatzeko lanean ari direnek argazkia erraldoia atera zuten zapatuan [ekainak 4], Arretxinagako zubian.
Mutrikun ere zapatuan egin zuten ekintza. Erroldoi eta buruhandiek lagunduta, adierazpena irakurri zuten, jai giroan. Ostean Larrain dantza egin zuten.
Ondarroan ere zapatuan egin zuten Adierazpen Eguneko ekintza, Alamedan.
Lekeition adierazpenaren aurkezpena egin zuten domekan [ekainak 5], Ikusgarri zinema aretoan. Eta ekintzak jendetza bildu zuen.
Mendexarrak ere ez dira atzean geratu, eta domekan adierazpena irakurri eta argazki erraldoia atera zuten, musika, kirol ekintza eta bertsolariek lagunduta. Herritarrak kamiseta laranjak jantzita egin zuten ekintza. Guztira, plazan, 100 herritar baino gehiago bildu zirela jakitera eman dute. Adierazpena Jose Txakartegik eta Hilari Lakak irakurri zuten. Eta ospakizunagaz amaitzeko,
84 lagun inguruk parte hartu zuten
bazkarian. Denaren gainetik, aurrera begira ere herritarren parte hartzea beharrezkoa dela azpimarratu eta plazan bildutakoei eskerrak eman zizkieten antolatzaileek.
Etxebarrian ere domekan irakurri zuten adierazpena, ume eta nagusien tailerrak egiteaz batera. Ostean, argazki erraldoia atera zuten.