Euskal Erromeriak musikagaz eta dantzekin alaitu ditu Lekeitioko kaleak

2016/06/06

Euskal giroa izan zen nagusi, zapatuan [ekainak 4], Lekeition. Zaletxuak, Aittitta Makurra eta Goi-Herri dantza taldearen eskutik ospatu zen Euskal Erromeriak musikagaz eta dantzekin alaitu zuen herria.

Euskal Erromerian parte hartu zuten dantzarietako batzuk Merkatu Plazan kalejirara ateratzeko prest.

Merkatu Plaza izan zuten bilgune Euskal Erromeriako parte hartzaileek, goizean. Arropak jantzi eta buruko zapiak jartzen zituzten bitartean elkar ezagutu eta hamaiketakoa jan zuten kalejirara irten orduko. Eguerdian egin zuten lehen kalejira Aittitta Makurrako Txikirri-Txikirri, Amaia eta Bidatz trikitilariekin eta txistulariekin lagunduta. Lekeitiokoez gain Amoroto, Ispaster, Mendexa, Deusto, Leioa, Mungia eta Bilboko dantzariak batu ziren Lekeitioko erromeriara eta giro ederrean ibili ziren dantzan herrian zehar. Batetik bestera ibili ziren dantzan, eta Foru plazan bai eta Eskolapean ere dantza saio dotorea eskaini zuten.

Dantzariak Eskolapean dantzan.

Eskoletan bazkalduta, kalejiran joan ziren plazara Lorratz taldearen erromerian dantzan egiteko. Gauerdira arte gutxi gorabehera neke barik dantzan ibili ziren dantzariak eta eurekin batera dantzan egitera animatu ziren herritarrak.