Lea-Artibaiko Ekintzaileen Eguna ospatuko dute Lekeition
Lea Artibaiko produktu eta zerbitzuen erakustoki izango den Lea-Artibaiko Enpresa Berrien IV. Azoka egongo da zapatuan [ekainak 18], 10:00etatik aurrera, Lekeitioko Eskolapean. Ekintza ezberdinak antolatuko dituzte eguerdira bitartean: erakustokiak, tailerrak eta networking gosaria besteak beste.
10:00etan izango da networking gosaria eta 11:30ean, berriz, ume eta gazteentzako sormen tailerrak eta margoketa librea egongo dira Lekeitioko aisialdi taldearen eskutik.
Horrez gain, Leartikerrek 3D printing tailerra eskainiko du.
Azkenik, 13:30ean, Azaro Fundazioak eta Leartibai Garapen Agentziak urtero antolatzen duen X. Lea-Artibaiko Enpresa Proiektu Lehiaketaren sariak banatuko dituzte. Ekintzaileen ahalegina eta lana saritzea helburu duen ekimen honek hiru modalitate bereizten ditu:
• Oinarri teknologiko berritzailea duten enpresak industrial eta zerbitzuetakoak 2.000 euroko sariagaz.
• Merkataritza, ostalaritza, turismo eta zerbitzu enpresak 1.500 euroko sariagaz.
• Kooperatiba izaera juridikoa duten enpresak (edozein izanik bere jarduera) 2.000 euroko sariagaz.
Lea-Artibaiko IX. Enpresa proiektu lehiaketako irabazleak euren sariekin.
