98 lagunek egin dituzte Markinatik Markina-Xemeinera arteko 64 kilometroak

2016/09/13

Aurten 70 urte betetzen dituela eta, iraupen luzeko martxa antolatu du hirugarren urtez Markina-Xemeingo Artibai Mendigoizale Taldeak, eta orain arte bezala, erantzun ona eduki du ekimenak. 98 lagunek egin zituzten domekan, Arabako Markinatik Markina-Xemeinera arteko 64 kilometroak “paisaia ikusgarrietan zehar”. Parte hartzaile bakoitzak bere erritmoan amaitu zuen ibilbidea. Helmugako mahaian heltzen lehena, 14:09etan, emakume bat izan zen; 9 ordu eta 9 minututan egin zuen ibilbide osoa. Azkenak, berriz, 15 ordu eta 45 minutu behar izan zituen 64 kilometroak osatzeko. Ibilbidea 05:00ak puntuan irten zuten martxa luzeko parte hartzaileak Arabako Markina herriko eliza aurretik. Gauez ekin zioten bideari, baina ibilbide guztia islatzaileekin markatuta eduki zuten. “Irudi bitxi bezain polita sortu zen kopeta argi eta islatzaileen argi txikiekin Gorbeiako azken landara arte”, aitatu dute antolatzaileek.

Parte hartzaileak eta antolatzaileak Saldropoko kontrolean. Argazkia: Artibai Mendigoizale Taldea

Atxuriko pasabidea gauez arrisku barik igarotzeko soka bat jarri zuen Artibai Mendigoizale Taldeak helduleku moduan, eta lehen tartea eginda, Saldropoko kontroleko kafea, edariak, fruta eta pastak asko eskertu zituzten parte hartzaileek. Indarberritu ondoren, Saldropoko paduratik Barazerra eta Dima gainetik Urkiolarako bidea egin zuten, Atxartetik Abadiñora jaisteko. Abadiñon jarri zuen mendigoizale taldeak bigarren kontrola, eta lehen kontroleko edari eta janariez gain txerrikiak ere eskaini zituzten ibiltarien sabelak betetzeko. Antolatzaileek azaldu dutenez, Oizko igoera izan zen gogorrena, eta eguerdiko beroan, Oiz puntan zegoen ura eskertu zuten parte hartzaileek. Hirugarren kontrola, azkenik, Longan egon zen, eta denetarik bazegoen ere, batez ere edari freskoa hartu zuten ibiltariek. 64 kilometroko martxa luzeagaz gain, 20 kilometroko laburra ere egon zen aukeran. Ibilbide biak bat egiten zuten Garai herrian eta handik bide bera egin behar zuten guztiek Markina-Xemeinera arte. 68 lagunek egin zuten laburra.

Ibiltariak Garaitik Markina-Xemeinera arteko bidea egiten. Argazkia: Artibai Mendigoizale Taldea

“Gustura” Parte hartzaileak martxaren amaieran kontatu zutenez, “oso gustura” gelditu ziren bai ibilbideagaz zein antolakuntzarekin eta leku ikusgarrietatik ibiltzeko aukera izan zutela azpimarratu zuten. Ibilaldi amaieran, gainera, motxila bat eduki zuten luzekoek opari modura eta laburrekoek berriz, poltsa bat, Artibai Mendigoizale Taldearen 70. urteurrenaren oroigarri gisa. Antolatzaileen balorazioa ere oso ona izan da, eta gazteen parte hartzea eta egin zuen beroa nabarmendu dituzte, batez ere. “Gure helburuak bete egin ziren gehienez 110 parte hartzaile geneuzkan aurreikusita eta”. Gainera, antolaketan zein kontroletan lagundu duten guztien lana ere eskertu nahi izan dute. Ia dena ondo joan bazen ere, istripu bat ere gertatu zela jakitera eman dute Artibai Mendigoizale Taldekoek. “Eroriko batean sorbalda atera zuen martxako parte hartzaile batek Atxuriko pasabidea baino beherago. Bere kasa, beste batzuen laguntzagaz Saldropoko kontrolera jaitsi eta Galdakaoko ospitalera eraman zuten. Denbora gutxira baina, helmugako mahaira agertu zen ezer larririk ez zeukala”. Martxa amaitu eta ibilbideko marka denak kendu ostean, hurrengo martxa zelan antolatu pentsatzen hasi da jadanik, Artibai Mendigoizale Taldea.