Fernando Franco zinema zuzendariak 'Morir' filma grabatuko du Ispasterren eta Lekeition
Morir Fernando Franco zinemagilearen bigarren film luzea da. Protagonistak Marian Alvarez eta Andres Gertrudix aktoreak dira. Filma Euskal Herrian grabatzen ari dira egunotan. Eta tartean, grabaketa batzuk Ispasterren eta Lekeition egingo dituzte.
Aurreikuspenen arabera, Lekeition zapatuan [urriak 1] egingo dute grabaketa.
Filmak bi protagonista nagusi ditu: Luis (Andres Gertrudix) eta Marta (Marian Alvarez). Gaixotasun bat tarteko, bi protagonisten bizitzak guztiz aldatzen dira. Gezurra, beldurra eta errua nahastuz, bikotearen arteko maitasuna da hari nagusia.
Filma Kowalski Films euskal ekoiztetxeak eta Ferdydurke Films ekoiztetxe andaluzak ekoiztuta dago.
Fernando Franco. Franco ospe handiko zinemagilea da. Muntaketa lanetan esperientzia handia dauka (Blancanieves, No tengas miedo, Que dios nos perdone), eta 2013. urtean lehenengo film luzea grabatu zuen: La Herida. Film hori, hain justu, 61. Donostiako Zinemaldiko protagonistetako bat izan zen eta epaimahaiaren sari berezia eskuratu zuen. Horrez gain, Marian Alvarez aktoreak Zilarrezko Maskorra lortu zuen film horretan egindako lanagatik.
Baina Franco haratago ailegatu zen. Espainiako Goya sarietan sei izendapen lortu zituen eta bi eskuratu: Zuzendari Nobel Onenaren saria eta Emakume Aktore Protagonista Onena (Marian Alvarez).
Forque sarietan ere Film Onenaren saria eskuratu zuen eta Alvarez ere saritu zuten.
Naziorte mailan ere entzutetsua izan zen La Herida: European Film Academy sarietan emakumezko aktore onenaren saria eta zuzendari nobel onenarena lortu zituen.
Andres Gertrudix. Argazkia: Youtube
Marian Alvarez. Argazkia: Youtube
