Giro ezin hobean egin da Lekeitio Sup Fest jaialdia
180 pertsonak parte hartu zuten joan den domekan [ irailak 25] Lekeitioko portuan ospatu zen Lekeitio Sup Fest jaialdian. Profesional eta amateur mailetako 30 kirolarik egin zuten distantzia luzeko Stand Up Paddle proba: 11 kirolarik egin zuten 9.000 metroko distantzi luzeko ibilbidea eta beste 19 kirolarik 4.000 metroko ibilbidea osatu zuten.
BigSup jarduerak ere harrera handia eduki zuen gazteen artean. Denetara 150 gazte animatu ziren BigSup jardueran parte hartzera. Txandaka Stand Up Paddle ohol kolektiboetan ibili ziren Lekeitioko portuan eta badian zehar.
Azkenik, jaialdiagaz amaitzeko, abiadura probak egon ziren eguerdian. 32 rider edo lasterkarik parte hartu zuten esprint modalitatean, eta antolatzaileek jakitera eman dutenez, aurtengo berrikuntza esprintak BigSup oholetan egitea izan da. “Bost taldeko kanporaketa jokatu zen, bost kanporaketatan, talde garailea erabaki arte”.
Eguraldiaren iragarpenak onak izan ez arren, goizeko lehen eta azken orduetan eguzkiak ere lagundu egin zuen eta giro ezin hobean egin da, aurten ere, Lekeitio Sup Fest.
“Itsasoaren egoerak distantzi luzeko lasterketa teknikoa izatera bultzatu zuen, eta lasterkariek gustura egin zuten portua, Santa Katalina lurmuturra eta Lea ibaiaren arteko ibilbidea”, azaldu dute antolatzaileek.
Natxo Riera izan zen Pro 14 mailako irabazlea, Pro 12’6” mailan, berriz, Cyara Palenzuela eta Aitor Eizagirre geratu ziren lehen postuetan.
Amateur mailari dagokionez, Isabel Bilbao eta Eneko Azkaraterentzat izan zen garaipena eta 18 azpikoetan Juan Ilarduya eta Aitziber Landa nagusitu ziren.
MAILAKAKO SAILKAPENA
Sprint Race abiadura proba Lekeitioko portuan. Argazkia: Ur Lekeitio
