Maria Teresa Dura margolariaren lanak, Ondarroako Udal Erakusketa Aretoan

2016/09/27

Koadroak. Horiek dira Maria Teresa Dura margolariaren bizitza eta pasioa. Joaten den lekura doala ere, ikusten duena ikusita ere, erretinatik sartzen zaion guztia koadro baten nola islatuko lukeen pentsatzen hasten da. Eta bere pasioari jarraituz, Espainia eta Euskal Herria osoa zeharkatu ditu azken urteetan. Eta bueltaka bueltaka, Ondarroara ailegatu zen iraila hasieran; bere lanen erakusketa ikusgai dago Udal Erakusketa Aretoan. Dena dela, gaur da bere lanak ikusteko azken eguna; bihar, dena jaso eta bere jaioterrira, Elchera (Alacant, Espainia) joango da. Arte Ederretan lizentziaduna da Dura, eta paisaiak dira bere pasioa. «Azkenaldian berdeguneek deitzen dute nire arreta». Azken sei urteetan margotzetik bizi dela azaldu du. «Herri ezberdinetan egiten diren margo lehiaketetatik bizi naiz».

Mutrikuar bat, igerilekuan urpekaritza egiten, Durak margotuta.

Margo lehiaketa horiek martxotik azarora bitartean egiten direla dio. «Karabana hartu eta herriz herri ibiltzen naiz. Hortik bizi naiz eta asko gustatzen zait». Tarteka, baina, erakusketaren bat ere ipintzen duela dio. «Asko gustatzen zait jendeak nire koadroei buruz gauza politak esaten dizkidanean». Jendaurrean margotzen. Ohiko erakusketetan ez modura, Ondarroakoan Dura margotzen egoten da erakusketa aretoa zabalik dagoen bitartean; aretoaren aurrean zutik ipini eta brotxa eskuetan duela, koadroak erraz egiten ditu. Eta hain justu, horrek ondarrutarren arreta erakarri duela dio. «Margotzen nagoenean, jendea geratu egiten da eta erakusketara sartu ere bai».

Durak egindako Ondarroako koadro bat, erakusketa aretoan.

Oñati, Legazpi, Plentzia, Mendaro, Sopela… Lehiaketaz lehiaketa, Euskal Herriko herri asko eta asko bisitatu ditu. Eta sari asko eta asko ere irabazi izan ditu; Mutrikuko margo lehiaketan lehenengo saria eskuratu zuen iaz. Ondarroan ere lehiaketa bat egin beharko litzatekeela aipatu du. «Azken lehiaketa duela hamar urte egin zuten Ondarroan». Gainera, lehiaketa antolatuko balute, parte hartuko lukeela dio. «Inguru honetako bazterrak asko gustatzen zaizkit». Eta horren adibide dira bere koadroak: Mutrikuko igerileku naturala, Ondarroako Zubi Zaharra, Itsasaurre zubia… Kolorez eta biziz betetako koadroak dira Durak egiten dituenak. Begiratu hutsagaz, berba egiten duten horietakoak. Azken urteetan Durak lortutako sari batzuk:

1. saria (2016): El Vendrell-eko (Tarragona, Katalunia) pintura lehiaketa
1. saria (2016): Azkoitiko pintura lehiaketa
1. saria (2016): Cintruenigoko (Nafarroa) pintura lehiaketa
1. saria (2015): Tazones-ko (Asturias, Espainia) 35. Pintura Lehiaketa
1. saria (2015): Mutrikuko 35. pintura lehiaketa
1. saria (2015): Santo Domingo de Silos-eko (Burgos, Espainia) pintura lehiaketa
3. saria (2015): LaBastide D’Armaganac-eko (Frantzia) pintura
1. saria (2014): XVI. Vicente Hernandez pintura lehiaketa (Valencia, Espainia)