Abian da 2017ko Peru Abarka Album lehiaketa
Markina-Xemeingo Udalak eta Ibaizabal argitaletxeak bat egin dute berriz ere, Peru Abarka Album Lehiaketaren bidez, 2017an ere, irakurleei album berri bat eskaintzeko. Urtero bezala, lehiaketa bi ataletan dago banatuta, eta abian jarri dute jada, narrazio onena aukeratzeko tartea. 2017ko otsailaren 3ra arte edukiko dute idazleek euren lanak aurkezteko epea.
Urteroko oinarrietan ez dago aldaketa nabarmenik. 18 urtetik gorako edozeinek har dezake parte lehiaketak duen kategoria bakarrean: helduentzako literatura. Ipuinak euskara batuan aurkeztu behar dira eta gaia librea da.
Neurriari dagokionez, narrazioek, gehienez, 12.000 karaktere izan behar dute, eta, gutxienez, 9.000 karaktere, espazioak barne.
Lanak DIN-A4 tamainuko orrietan aurkeztu behar dira, Markina-Xemeingo Udalaren Erregistro Orokorrean bertan edo posta bidez ere bidali daitezke udalera.
Irabazleak 1.700 euroko diru saria jasoko du eta bere lana album formatuan argitaratuko da.
Peru Abarka Album Lehiaketaren Beroki gorria albumaren aurkezpena.
Ilustrazio lehiaketa. Narrazio irabazlea aukeratu ondoren ilustrazio lehiaketa jarriko dute martxan, eta horretarako, testu irabazlea gaztelaniara itzuliko dute, lehiaketan parte hartuko duten ilustratzaile ez euskaldunentzat lagungarria izateko. Narrazio irabazlea, eta horren behin-behineko itzulpena, beraz, eskuragarri egongo dira lehiaketaren blogean: www.peruabarka.wordpress.com.
