Bizkaiko Pala Txapelketako finalak jokatuko dituzte Lekeition
Bizkaiko Pala Txapelketako txapelen bat Lea-Artibaira etortzeko aukera handiak daude. Izan ere, asteburu honetan erabakiko dira 26. Bizkaiko kluben arteko pala txapelketako maila guztietako irabazleak, eta final guztietan daude bertokoak.
Lehen mailako txapelak barikuan [urtarrilak 27] lehiatuko dira Barakaldon, beste maila biak berriz, Lekeition jokatuko dituzte zapatu arratsaldean [urtarrilak 28].
19:00etan hasiko da Barakaldoko norgehiagoka. Zornotzako Betiko A eta Lea A aurkituko dira aurrez aurre. Talde biak maila ona erakutsi dute txapelketan zehar, beraz, borroka bizia espero da.
Lekeitioko frontoiak hartuko ditu, bestalde, 2. eta 3. mailetako finalak. 17:00etan hasiko dira , eta 3. mailako txapeldun eta txapeldunordeak erabakiko dira lehenbizi. Lea Bk Zeanuriko Joko Alai taldearen kontra neurtuko ditu indarrak garaipena eskuratzeko.
Jarraian hasiko da 2. mailako lehiaketa Zierbana J eta Lekeitioko Akarregi A taldeen artean.
