Hericoast-Interreg Europa proiektuko kideek Lea-Artibai bisitatu dute

Proiektua koordinatu eta praktika onak ezagutzeko asmoz, Hericoast-eko kideak Lea-Artibain egon ziren joan den astean. Hiru egunetan zehar eskualdea ezagutzeko aukera eduki zuten. Besteak beste, Markina-Xemeingo Arretxinagako ermita, Frontoia eta Zesta Puntaren historia, Ondarroako Atxeternu, portua, alde zaharra, hondartzako eta Calatrava zubiak eta Lekeitioko Mendieta, eliza, Santa Katalina Itsasargiko Interpretazio Zentroa, Lea Ibilbidea, Bengola Natur Energien Interpretazio Zentroa bisitatu zituzten, eta gainera, bertoko produktuak dastatzeko aukera ere eduki zuten. Leartibai Garapen Agentzia, kostaldeko kultura ondarea kudeatzeko lurralde politikak hobetzea helburu duen Herikoast-Interreg Europa proiektu europarrean parte hartzen ari da, ondarearen ustiapen eta babes ekintzen arteko oreka lortzeko bidean. Eskualde Garapenerako Europako Funtsaren (EGEF) dirulaguntza jaso duen proiektu horrek, bost urteko iraupena izango du.
Hericoast proiektukoak zesta-punta ezagutzen Markina-Xemeingo frontoian. Argazkia: Leartibai Garapen Agentzia

Hericoast proiektukoak zesta-punta ezagutzen Markina-Xemeingo frontoian. Argazkia: Leartibai Garapen Agentzia

Leartibai Garapen Agentziakoek azaldu dutenez, eskualdeko ondare natural, kultural eta, oro har, paisaia guztiagaz liluratuta gelditu ziren europako kideak, eta datorren maiatzean Erresuma Batuan ospatuko den Marinescape Forum izeneko ondarearen inguruko topaketara gonbidatu dituzte. Gainera, bisitatu dituzten esperientzietako bat aurkezteko aukera ere proposatu zieten.

Nazioarteko partaidetza. Leartibai Garapen Agentziagaz batera, Hericoast proiektuan Vest Adger Diputazioak (Norvegia), Gaztela eta Leongo Juntak (Espainia), Molise eskualdeak (Italia), Donegal Diputazioak (Irlanda), Tulcea eskualdeak (Errumania), CIVISCAPEk eta Amsterdameko Unibertsitateak (Holanda) parte hartzen dute. Lea-Artibai eskualdeari dagokionez, tokiko lan-taldearen barruan, ondarearen inguruko politikak garatzen dituzten erakundeekin elkarlanean ari da garapen agentzia: Eusko Jaurlaritzaren Ogasun eta Finantza Sailagaz, Eusko Jaurlaritzako Kultura saila eta Ondare Kulturaleko Zuzendaritzagaz, Hazigaz, Basquetouregaz, Lea-Artibaiko udalekin eta enpresa-sareagaz, kultura eta ondare elkarteekin.

Hericoast proiektuko bazkideak Lea-Artibai eskualdean zehazr bisitan. Argazkia: Leartibai Garapen Agentzia

Hericoast proiektuko bazkideak Lea-Artibai eskualdean zehazr bisitan. Argazkia: Leartibai Garapen Agentzia

Hericoast-Interreg Europa proiektuko hurrengo urratsa eskualde bakoitzeko bost praktika on identifikatzea izango dela jakitera eman dute. “Maiatzean, Gaztela eta Leonen, proiektuko partaide guztiok ospatuko dugun topaketan aurkezteko”.