Irati Lasarte gimnastikalari ondarrutarra Gipuzkoako Txapelketarako sailkatu da
Gimnastikalari ondarrutarrak Ibarran jokatu zuen domekan [martxoak 26] Gipuzkoako Txapelketara sartzeko bigarren kanporaketa saioa. Eta horretan, taldeka lehenengo postua lortu dute Lasartek eta haren taldekideek. Gainera, sailkapen orokorrean ere lehendabiziko postua lortu dute. Bakarka, Lasartek bigarren egin zuen uztaiagaz, eta sokagaz ere bigarren geratu da sailkapen orokorrean.
Emaitza horiekin, maiatzaren 20an Eibarko Ipurua kiroldegian jokatuko den Gipuzkoako Txapelketarako sailkatu da ondarrutarra. Horretan, hain zuzen ere, ondarrutarrak taldeka eta bakarka parte hartuko du; bakarka uztaiagaz eta sokagaz ariko da.
Maiatzaren 20ko txapelketa horretan ondarrutarra lehendabiziko bosten artean geratzen bada (taldeka zein bakarka), Euskadiko Txapelketan aritzeko txartela lortuko du. Euskadiko Txapelketa hori ekainaren 3an jokatuko da.
Irati Lasarte, ezkerretik lehenengoa, taldekideekin batera.
Irati Lasarte eta haren taldekideak.
