Zabalik dago XI. Lea-Artibaiko Enpresa Proiektu Lehiaketara aurkezteko epea

Eider Mugartegi

Amoroto,Aulesti,Berriatua,Gizaburuaga,Ispaster,Lekeitio,Markina-Xemein,Mendexa,Munitibar,Mutriku,Ondarroa,Ziortza-Bolibar

2017/04/04

Azaro Fundazioa eta Leartibai Garapen Agentziak urtero antolatzen duten Lea-Artibaiko Enpresa Proiektu Lehiaketa martxan dago. Lehiaketara, 2016 urteaz geroztik Lea-Artibai eskualdean enpresa berri bat martxan jarri duten edo 2017an martxan jartzeko asmoa duten ekintzaile guztiak aurkeztu daitezke. Apirilaren 12an bukatuko da proiektuak aurkezteko epea. Ekintzaileen ahalegina eta lana saritzea helburu duen ekimen horrek hiru modalitate bereizten ditu: negozio ideia berritzaileak; merkataritza, ostalaritza, turismo eta zerbitzu enpresak; eta, kooperatiba izaera juridikoa duten enpresak. Kooperatiba proiektuen modalitatera aurkezten direnak, Lea-Artibai eskualdean kokatzen direnez gain, Busturialdea, Durangaldea eta Debabarrena eskualdeetan kokatutakoak ere parte hartu ahal izango dute.

X. Enpresa proiektu lehiaketaren irabazleak, antolatzaile eta udal ordezkariekin.

Hiru modalitateen kasuan, Lea-Artibaiko Berrikuntza Gunean dagoen enpresa-haztegian kokatzeko erraztasunak izango dituzte saria eskuratzen dutenek eta enpresa martxan jarri arte eta ondorengo urteetan aholkularitza eta laguntza jasoko dute erakunde antolatzaileen eskutik. Sari banaketa apirilaren 29an egingo da Berriatuan ospatuko den Lea-Artibaiko Ekintzaile Egunaren baitan. Egun horretan gainera, Berriatuako Nekazal eta Arrain Kontserba Azoka eta Enpresa Berrien V. Azoka ere ospatuko da. SARIAK

Negozio ideia berritzaileak: 2.000 euroko saria.
Merkataritza, ostalaritza, turismo eta zerbitzu enpresak: 1.500 euroko saria.
Kooperatiba izaera juridikoa duten enpresak (edozein izanik bere jarduera): 2.000 euroko saria.

Lehiaketan parte hartzeko interesa duten guztiek informazio zabala, izen emate orria eta lehiaketaren oinarriak eskuragarri izango dituzte Azaro Fundazioa eta Leartibai Garapen Agentziaren bulegoetan eta webguneetan.