II. Musikaia Eguna ospatuko du Lekeitioko Musika Eskolak
Bigarren urtez, musika herrira zabalduko dute barikuan [apirilak 7] Musikaiako ikasle guztiek. Musikaia Eguna Musika Eskola osatzen duen komunitate osoari eskainitako ospakizun eguna dela azpimarratu dute Musikaiako arduradunek: “Herritar, ikasle, guraso, familia eta musikari orori eskainia”.
Horrela, 17:00etan Nautikatik irten eta bi taldetan banatuta kalejiran ibiliko dira herria musikaz girotzeko. Batzuk portutik eta besteak Eskolapetik egingo dute ibilbidea, eta gero guztiak plazan elkartuko dira emanaldi bat eskaintzeko.
Ikasle eta talde ezberdinek hartuko dute parte emanaldian: Banda txiki, koral gazte, korala eta hainbat musika tresna entzuteko aukera egongo da. Trikitixa taldeak, perkusio taldeak ere hartuko dute parte ospakizunean, eta arduradunek aurreratu dutenez, solfeoko ikasleek abestu egingo dute.
Herritar, guraso eta ikasle guztiak gonbidatu dituzte herria alaitzeko asmoz sortutako jaira. Emanaldia amaitutakoan, gainera, txokolatada ere egongo da.
Musikaia Musika Eskolako musikariak kalerik kale. Argazkia: Musikaia
