Bi musika emanaldi egongo dira aukeran Mutrikun

2017/04/06

Alde batetik, Mutrikuko Udal Musika Eskolako ikasleen kontzertua egongo da barikuan [apirilak 7], 17:30ean, Zabiel kultur etxeko hitzaldi aretoan. Bestetik, zapatuan [apirilak 8], Mutrikuko Udalak antolatutako Musika Hilabetearen baitako azken emanaldia eskainiko du Arriola & Barandiaran bikoteak, 20:00etan, komentuan. Musika eskolak jakitera eman duenez, gaurko kontzertuak bi zati edukiko ditu: «lehenengoan bakarlari bat ariko da gitarrarekin (Vesi), eta bigarrenean Blackstar taldearen lehengo kontzertua eskainiko dugu».

Argazkian: Vesi eta Blackstar taldeko kideak. Argazkia: Mutrikuko Udal Musika Eskola

Musika eskolakoen errepertorioa. Vesik ondoko hiru abestiak eskainiko ditu: All of me, Solo tu eta Badira hiru aste. Blackstar taldeak, aldiz, lau abesti eskainiko ditu: Bajo el mismo sol, Sin miedo a nada, Lorerik ederrenak eta Live is life. Zapatuan, aldiz, Nerea Arriola Mendieta biolin jotzaileak eta Esther Barandiaran Amillano piano jotzaileak emanaldi lasaia eskainiko dute. Aurreratu dutenez, bikoteak bederatzi pieza eskainiko ditu; Mozart, Wieniawski, Vieuxtemps, F. Chopin eta Sarasate musikari eta konpositoreen abestiak eskainiko dituzte.