Aldundiak 54.000 euro emango dizkio Simon Bolivar Museoari aurtengo jarduerak finantzatzeko
“Gure kultura sustatzeko, ezagutzera emateko eta zabaltzeko” helburuarekin emango dizkio Bizkaiko Foru Aldundiak 54.000 euro Ziortza-Bolibarko Simon Bolivar Museoari. Aurreratu dutenez, diru laguntza hori aurtengo jarduerak finantzatzeko erabili ahalko du museoak. Halaber, diru laguntza Ziortza-Bolibarko Udalaren eta aldundiaren arteko lankidetza hitzarmena tarteko bideratu dute.
54.000 euroak zeintzuk ekintzetara bideratuko duten ere zehaztu dute: Simon Bolivar Askatzailea-ren jaiotzaren urteurreneko ospakizunak (uztailean), zentroak Museon Nazioarteko Egunean (maiatza) egingo dituen ekintzak, Ondarearen Europako Jardunaldien (urria) baitan egingo diren ekintzak eta Ziortza-Bolibarko errotak eta burdinolak erakusketa.
Simon Bolivar Museoa 1983ko uztailaren 24an zabaldu zen, Simon Bolivarren (1783-1830) jaiotzaren bigarren mendeurrenean. Museoak dituen bildumek Bizkaiko Erdi Aroko historia eta Askatzailearen ibilbide pertsonal eta politikoa islatzen dituzte.
