Aste batzuetan lotuta eduki ostean, Beheko Mojen Plazako tirolina erabiltzeko moduan ipiniko du bihar [ekainak 2] Markina-Xemeingo Udalak. Hemendik aurrera baina, ordutegi zehatz bat izango du: 11:00etan martxan jarri eta 20:00etan berriro lotu egingo dute brigadako beharginek. Ordutegia finkatzearekin batera, udaltzaingoak inguru horretako zaintza handiagotuko duela ere azaldu du udalak, eta erabilera arauak zehazten duten kartelak ere jarriko dituzte.
Tirolina martxan egon zen bitartean, erabiltzaileek jarrera desegokiak izan zituztela salatu zuten inguruko bizilagunek, eta horregatik tirolina behin-behinean geldiaraztea erabaki zuen udalak. Horrelakorik berriro gertatu ez dadin, erabileraren jarraipena egingo dute.
Bizikidetza. Tirolinaren erabiltzaileen eta inguruko bizilagunen arteko bizikidetza on bat lortzea da udalaren helburua. “Udala konbentzituta dago arazoa ez dela tirolina bera, erabiltzaile batzuen jarrera desegokia baizik”. Are gehiago, tirolinaren inguruan eman diren portaera desegokiak denbora luzean herri osoan errepikatzen ari direla azaldu dute, eta portaera batzuk benetan arduratzekoak direla uste du udalak.
“Udalak auzo biziak sortzeko bere ahaleginean lanean jarraituko du, ume eta gaztetxoei kanpoko jolasak eskainiz eta aisialdi aukera berriak sortuz”. Helburu horregaz, aurrera begira, beste auzo batzuetan jolas gehiago jartzea da udalaren asmoa.
Markina-Xemeingo Beheko Mojen Plazan dagoen tirolina.
Iruzkinen atala
