Jendetza batu da asteburuan Oletan
Zapatuan zein domekan “jende asko” batu dela azaldu dute Oletako Jai Batzordeko kideek. “Oso ondo joan da asteburua, iazko antzera zapatuan jende asko egon zen, eta baita atzo ere”.
Zapatu iluntzean tortillak prestatzen aritu ziren kuadrillak, eta zortzi tortilla aurkeztu zituzten. Ondoren, giro ederra izan zuten Guda Dantza, Hesian eta Ingo al deu taldeen kontzertuetan. Egunak argitu arte, gorputzak astintzen eta eztarriak berotzen aritu ziren Oletarako hurbildutakoak.
Atzo eguerdian, berriz, Oletako zelaian meza entzun ostean, Amorotoko Arta-Nagusi dantza taldeko kideen saioaz gozatu zuten herritarrek.
Arratsaldean plaza bete jende batu zen Mendexa eta Mendaroko neska-mutilez osaturiko taldeen arteko giza proba deman. Mendaroko taldeak irabazi zuen 111 untzako marka lortuta. Mendexarrek, ostera, 100 untza egitea lortu zuten.
Giza proba amaitzean, zozketa egin zuten. 1402 zenbakiari egokitu zaio lehenenego saria (Kantabrian asteburu pasa), 1113 zenbakiarentzat izan da aurtengo bigarren saria (Urdaiazpikoa) eta 1644 zenbakia da hirugarren sariduna (Krianza ardo kaxa bat).
Oletako Jai Batzordeko kideek adierazi dutenez, saridunek 15 eguneko epea dute saria jasotzeko. Saridunak agertu ezean, hauek dira ordezko zenbakiak: 1375 (lehenengo saria), 1648 (bigarren saria) eta 2220 (hirugarren saria).
Bestalde, arratsaldea borbiltzeko Itsaso eta Irune Elizgoien Etxalarko ahizpen erromerian batu ziren.
Gaur, berriz, Pazko jaien azken eguna dute amorotarrek. Arratsalderako umeentzako animazioa prestatu dute. Gero, Luhartz taldearen erromeriagaz agurtuko dituzte jaiak, eta gizonen eta emakumeen striptease-ak ere ez dira faltako.
GAURKO EGITARAUA:
Jende asko batu zen giza proba dema ikusten.
Argazkia: Oletako Jai Batzordea.
- 17:30. Haur eta gazteentzako jolasak: Bat, bi, hiru festa!
- 23:00. Erromeria Luhartz taldegaz.
- 00:45. Gizonen eta emakumeen striptease-a.
- Oharra. Autobus zerbitzua 22:30etik 00:00etara Lekeitiotik (Eskolapetik irtenda). Bueltan 02:30etik 04:00etara.
- JOANEKO ZERBITZUA:
- 21:30. Munitibar, Ondarroa eta Ziortza-Bolibartik.
- 21:35. Aulesti, Berriatua eta Etxebarritik.
- 21:40. Gizaburuaga eta Markina-Xemeindik.
- 22:00. Amoroto, Ispaster eta Mendexatik.
- BUELTARAKO ZERBITZUA:
- 02:15/04:15/05:45. Aulesti, Berriatua, Etxebarria, Gizaburuaga, Ispaster, Markina-Xemein, Mendexa, Munitibar, Ondarroa eta Ziortza-Bolibarrera.
- 02:00/04:00/05:30. Amoroto, Ispaster eta Mendexara.
