IV. Aste Musikala ospatuko du Lekeitioko Musikaia Musika Eskolak
Ikasturteari bukaera emateko IV. Aste Musikala deituriko kontzertu sorta eskainiko du datorren astean Lekeitioko Musikaia Musika Eskolak. Ekainaren 21ean, 22an eta 23an izango dira kontzertuak, 19.00etan, Ikusgarri zinema aretoan.
Musikaia Musika Eskolako zuzendariek azaldu dutenez, musika tresna ezberdinez osatutako taldeak parte hartuko dute kontzertuetan, eta estilo ezberdinetako abestiak eskainiko dituzte.
Azken egunean [ekainak 23], gainera, kontzertu berezia egongo da. Francesca Sanna idazlearen liburuan oinarritutako errefuxatuei buruzko antzerki bat egingo dute. “Miren Agur Meabe idazlearen laguntzagaz egindako antzerki honetan hainbat abesti abestuko dituzte “.
Leku arazoak. Urtero bezala, edukieragaz egoten diren arazoak direla eta, aurten gonbidapenekin mugatuko dituztela sarrerak jakitera eman dute Musikaiako zuzendariek. “Egun bakoitzeko sarrerak kontzertu aurretik salduko ditugu, 18.00etatik 18.30era, zinemako leihatilan, euro baten truke”.
Ikusleentzat, 18:40tan zabalduko dituzte zinemako ateak eta gonbidapen edo sarrerarik barik ezin izango dela sartu gogorarazi dute.
Musikaiako ikasleek eskainitako kontzertuko irudiak. Argazkia: Musikaia
