Markina-Xemeinek eta Gernikak jokatuko dute Bizkaiko Herriarteko finala
Gaur 18:00etatik aurrera jokatuko dituzte finalak, Markina-Xemeingo Uni frontoian. Bestalde, zesta eskoletako ikasleen topaketa hartuko du bihar Gernika-Lumoko Jai Alai frontoiakIaz bezala, aurten ere Markina-Xemein eta Gernika-Lumoren artean erabakiko...
Gaur 18:00etatik aurrera jokatuko dituzte finalak, Markina-Xemeingo Uni frontoian. Bestalde, zesta eskoletako ikasleen topaketa hartuko du bihar Gernika-Lumoko Jai Alai frontoiak
Iaz bezala, aurten ere Markina-Xemein eta Gernika-Lumoren artean erabakiko da Bizkaiko Herriarteko Zesta-Punta Txapelketa. Gaur 18:00etan jokatuko dute finala, Markina-Xemeingo Unibertsitatean. Kadete, gazte eta nagusiak aterako dira kantxara, ordena horretan.Finala jokatzen lehenengoak Markina-Xemeingo Zesta-Punta Taldeko Alex eta Ander eta Gernika Jai Alai eskolako Arratibel eta Unda izango dira. Gazte mailan, Markina-Xemeingo Gorka eta Danel eta Gernika-Lumoko Leke eta A. Urrutxuaren arteko partida jokatuko da, eta azkenik, Markina-Xemeingo Meabe eta Elkoro I eta Gernikako X. Urrutxua eta Learreta nagusien mailako bikoteen norgehiagoka.
Hirugarren urtez finalean egongo da Markina-Xemeingo taldea. Iaz txapela janztea lortu zuten, eta aurten ere Bizkaiko sari nagusia eskuratzea bilatuko dute. Gernika-Lumoko bikoteek, hala ere, ez dituzte gauzak erraz jarriko, eta iazko arantza kendu eta garaipena bere egitera aterako dira kantxara.
Zesta eskolen topaketa
Gernika Jai Alai Eskolaren eskutik, zesta eskoletako ikasleen topaketa egongo da bihar, Jai Alai frontoian. Etxeko eskolako kideekin batera, besteak beste, Ereñoko, Markina-Xemeingo, Berriatuko, Mutrikuko, Zumaiako edota Hondarribiko eskoletako umeak elkartuko dira.
11 zesta eskoletako ikasle eta ordezkariek parte hartuko dute eskola gernikarrak antolatzen duen bigarren topaketan. «Iaz bi egunetan egin genuen topaketa, aurten, berriz, egun bakarrean jokatuko dituzte partiduak. Gutxi gorabehera 50 umek parte hartuko dute», azaldu dute Gernika Jai Alai Eskolako kideek.
10:00etan elkartu eta 13:00ak arte ariko dira jokatzen. Eguerdian elkarregaz bazkalduko dute Basurde Rugby Tabernan. Bazkalostean, 15:00etan hasiko dira partiduak jokatzen, eta 20:00ak arte ariko dira. Benjamin, alebin, nesken eta ume kategorietako ikasleen partiduak izango dira. Amaieran, luntxa izango dute, eta parte hartzaile guztiek domina bana jasoko dute.
Gernika Jai Alai eskolako ordezkariek zehaztu dutenez, topaketaren helburua eskoletako umeak «elkartzea» eta egun pasa eginez «elkarregaz gozatzea» da.
