Indartsu hasi eta amaitu dira Markina-Xemeingo Karmen jaiak

2017/07/18

Girotsuak eta koloretsuak. Horrelakoxeak izan dira aurten ere Markina-Xemeingo Karmen jaiak. Serafin Ibarrak botatako txupinagaz hasi ziren barikuan [uztailak 14], eta urtero egin modura, Alarabi erreta amaitu ziren atzo [uztailak 17]. Hala, lau egunez, Markina-Xemein kolorez eta jai giroz jantzi da. Markina-Xemeinek daukan izaera euskalduna azpimarratuz eta munduan dagoen sufrimendua gogora araziz eman zien jaiei hasiera Serafin Ibarrak. «Ezin dugu ahaztu errefuxiatuak ez eta euskal presoak. Azken horiek, gainera, zigor bikoitza betetzen dute: sakabanaketaren ondorioak eta kartzela zigorra». Markina-Xemein herri euskalduna dela ere gogora ekarri zuen. «Baina ez ahaztu, euskaldun izaten jarraitzeko euskara ahoan eduki behar dugula». Txupina bota ostean, jai giroak ez du etenik eduki. Aipatzekoa da Donge, Sociedad Alkoholika eta Huntza taldeek bariku gauean eskainitako kontzertuak jendetza batu zuela; giroa sekulakoa izan zen; txosnetan lanean aritu zirenek ere jende asko egon zela baieztatu dute. Zer esanik ez Kuadrilla Egunari buruz. Udal ordezkariek azaldu dutenez, inoizkorik parte hartze handiena egon da: 2.700 herritar batu ziren zapatuan Zelaian bazkaltzen, iaz baino 250 gehiago. Eguraldia lagun, eguna sekulako jai giroan ospatu zuten. Frontoi txikiko pilota partiduek ere herritarrak erakarri zituzten, eta musikarien kalejirak herriguneko giroa piztu zuen bai goizean zein arratsaldean ere.

[zuzenean ARGAZKI GALERIA IKUSI]

Iaz Castellersak bezala, aurten Peraltako erraldoien eta dultzaineroek sortu dute ikusmina erraldoi ikaragarriak erabili zituzten dantzan-eta herrian zehar. Zelaia dantzan. Goiko Portalean Larrain Dantza egin eta gero, jai giroa Zelaian egon zen batez ere, Kuadrilla Egunean. Eta bazkalostea Herritxouak girotu zuen. Guztira 11 taldek eskaini dute emanaldia aurten, eta beti bezala musika, umorea eta dantza izan dira protagonistak. Oraingoan ere, Zelaian batutakoak ere dantzan jarri zituzten Abarka antzerki taldekoek. Dantzak gainera, ez zuen etenik izan. Mahaiak eta aulkiak batuta, erromerian jarraitu zuten batzuek Zelaian, eta txarangaren atzetik dantzan ibili ziren beste asko alde zaharrean zehar. Domekan [uztailak 16] ospatu zuten markina-xemeindarrek egun nagusia, eta urtero legez, Xemein abesbatzak abestutako mezaren ostean aurreskua egon zen Goiko Portalean. Bero handiaren eraginez, Arkupean barik eguerdiko kontzertua Kontzekupean eskaini du aurten Debako bandak. Karmen Egunez ez dira falta izan herri kirolak, zesta partidak, bertso saioa ez eta mariatxiak ere, eta guztiek izan dute publikoaren erantzun ona.

[zuzenean ARGAZKI GALERIA IKUSI]

Jaiak iraun duten bitartean, txistularien kalejiragaz hasi da herria esnatzen egunero, eta atzo [uztailak 17] ere jairako deia egin zuten herriko txistulariek. Aurten egunero ume eta gaztetxoei begirako ekimenak eskertu badituzte ere, atzo izan zuten euren eguna eta goizetik gozatu zuten. Zelaiko eta Arkupe aurreko parke eta guneetan ibili ziren gustura puzgarrietan saltoka eta gora eta behera. Eta, zelan ez, Goazeneko lagunekin dantzarako eta kanturako duten trebetasuna ere erakutsi zuten. Markina-Xemeingo Karmen jaietako zesta-punta finalak ere jokatu ziren atzo goizean. Erika eta Denis izan ziren irabazleak benjamin mailan eta Osoitz eta Atain txikietan. Benjamin eta txikien mailako azpitxapeldunak, berriz, Julen eta Jokin eta Iñigo eta Aner izan ziren. Mus eta Briska txapelketak jokatu ziren arratsaldean Plazabarripean. 46 bikotek egin zuten briskan eta 47k musean. Briskako txapeldunak Idoia Zenikazelaia eta Asun Garitagoitia mallabiarrak izan ziren, eta musekoak, berriz, Memex eta Boni. Kantuan ere ibili ziren herritarrak gustura iluntzean, eta frontoiko Sinergia ikuskizunaren ondoren erre zuten Alarabi Zelaiaren erdian, su festagaz lagunduta, 2017ko karmen jaiei amaiera emateko.

Markina-Xemeingo Karmen jaiak 2017-Xemeingo Karmen jaiak 2017

Erlazionatutako edukiaARGAZKI GALERIA: Markina-Xemeingo Karmen jaiak 2017