Lekeitioko Udalak konponketa lanak egingo ditu kiroldegian eta igerilekuan
Bihar (abuztuak 26) hasi eta irailaren 24ra arte itxita egongo da trinketeko igerilekua. Lekeitioko Udalak inpermeabilizazio lanak egingo ditu tarte horretan, eta bitartean Ondarroako edo Markina-Xemeingo igerilekuak erabil ditzaketela jakinarazi die erabiltzaileei.
Igerilekuagaz gain, hobekuntzak burutuko dituzte bai eta Santi Brouard kiroldegian ere. Aldageletako dutxak eta saunak hobetu eta margotze lanak egingo dituztela azaldu dute. Obra horiek burutzeko ere itxita egon beharko da instalakuntza. Irailaren 1etik 24ra itxiko dute kiroldegia, hain zuzen.
“Kirol instalakuntza hauen behin-behineko itxiera aurreko bi urteetan hasitako inbertsio plan baten ondorioa da, azken urteetako konponketa eta inbertsio faltaren ondorioz sortutako gabeziak konpondu eta instalakuntzak hobetzeko helburuagaz”, azaldu du udalak.
Bide batez, gimnasioan makina berriak ere ipiniko ditu udalak, eta horrek guztiak 102.419 euroko inbertsioa suposatuko du.
Santi Brouard kiroldegiko kantxa.
