Euskal Herriko Hiru Txirlo bolo txapelketako saioak, Lea-Artibain
Zapatuan [irailak 23] hasi eta urriaren 28ra bitartean, Euskal Herriko 28. Hiru Txirlo Bolo Txapelketa egongo da jokoan. Saioetako bi gainera, Lea-Artibai eskualdean jokatuko dira: Markina-Xemeingo Barinaga auzoan eta Ziortza-Bolibarko Iruzubietan.
Azkoitiako Floreagako bolatokiak hartuko du lehen saioa, zapatuan, 17:00etan hasita, eta bost euro ordaindu beharko da lehian izena emateko. Izena, beti bezala, saioaren egunean bertan eman behar da, azken tiralariak tiraldi guztiak bota orduko.
Guztira lau saiok osatuko dute txapelketa, eta bolatokietako arduradunek jadanik bolak aukeratuta dituzte. Hala, txapelketako bola 0 zenbakia izango da, eta apurtuko balitz, ordezkoa, 5a.
Sariak, saioko. Ohi den bezala, nahi duen guztiak parte hartu dezake saio bakoitzean, eta hiru tiraldi egiteko aukera izango dute.
Asteburu bakoitzean, sariak egongo dira. Lehenengoa gelditzen denak 65 euroko saria jasoko du, bigarrenak 50 eurokoa, hirugarren sailkatuak 35 eurokoa, laugarrenak 20 eurokoa, bosgarrenak 10 euro jasoko ditu, eta seigarren sailkatuak oparia.
Saioak hasi orduko tiraldiak egiteko aukera egongo da, euro baten truke, bolatokiko pista zelan dagoen probatzeko.
Biharko saioaren ondoren, urriaren 7an helduko da Lea-Artibaira txapelketa. Barinagako bolatokiak hartuko du bigarren jardunaldia. Hirugarren bolatokia Eibarkoa izango da, Asola Berrikoa hain zuzen, eta urriaren 21ean izango da bertako hitzordua. Azken saioa Iruzubietan egingo dute, urriaren 28an. Bertan erabakiko da aurtengo txapelduna.
Gazte bat bolo jokoan jokatzen Arrateko bolatokian. Argazkia: Mikel Urkia Zuloaga
