Eskualdeko triatletek emaitza onak lortu dituzte Munduko Ironman Txapelketan

2017/10/16

Mireia Arrillagak bere kategoriako (emakumeak 25-29 urte) 10. postua lortu zuen zapatuan [urriak 14], Kailua-Konan-en (Hawaii, AEB) jokatu zen Munduko Ironman Txapelketan. Igerian, bizikletan eta korrika egin beharreko 226 kilometroak 10.46.07-ko denboran osatu zituen lekeitiarrak.

Mireia Arrillaga IronMana amaituta, helmugan.

Arrillaga, baina, ez da izan Hawaiiko proba handian egon den eskualdeko ordezkari bakarra. Arnaitz Burgoa ondarrutarrak ere parte hartu zuen munduko norgehiagoka ospetsuan. Bere kategoriako (gizonezkoak 40-47 urte) 27. postua eskuratu zuen ondarrutarrak 9.40.28 denbora eginez. Denborak. Igeriketa saiotik 8. postuan irten zen Mireia Arrillaga ordubete eta 16 segundoko lanaren ostean. Bizikletako 180 kilometroak 05.47.25-ean amaitu zituen, eta korrikako 42 kilometroak berriz, 03.50.56 denboran egin zituen. Arnaitz Burgoak, ostera, 57. postuan amaitu zuen igeriketako proba 3.800 metroak ordubetean eginez. Bizikletan ondo ibili zen ondarrutarra, eta 33. postuan jarri zen 5.00.53 denbora beteta. Korrikako 42 kilometroak, azkenik, 3.30.22 denboran osatu zituen, 36. postuan.

Mireia Arrillaga eta Arnaitz Burgoa lagun taldean, Hawaiin. Argazkia: Ondarroako Kirolaren leihoa

Hawaiikoa hirugarren Ironmana izan da Mireia Arrillagarentzat, Arnaitz Burgoak, berriz, tamaina horretako sei egin ditu, eta bigarrenez parte hartu du Hawaiiko Munduko Txapelketan, 2014an egin zuen lehenengoa, eta oraingoan, orduko emaitza hobetzea lortu du. Sailkapen orokorrari dagokionez, emakumeen proba Daniel Ryf-ek irabazi zuen: 08.50.47. Suitzarra hirugarren urtez jarraian nagusitu da munduko txapelketan. Gizonetan Patrick Lange izan zen azkarrena: 08.01.40. Eneko Llanos gasteiztarrak 24. postuan amaitu zuen 08.40.52 denboragaz.