Josu Agirreamalloa markina-xemeindarra, Cafes Baque pilota txapelketako garaile
Etorkizuneko pilotarien 32. Cafes Baque Txapelketa irabazi du Josu Agirreamalloa Markina-Xemeingo Esku Pilota Taldeko pilotariak. Gazte mailako faboritoa zen Agirreamalloa, eta final laurdenetan edo finalurrekoan egin zuen modura, aurreikuspenak bete eta erraz irabazi zuen Iurretako Olaburu pilotalekuan jokatu zen eskuz banakako finala.
6-0 irabazten hasi eta berehala 9-1 eko abantailagaz jarri zen aurretik Agirreamalloa, eta aurkari zuen Atxondoko Josu Egurenek, nahiz eta partida ona egin, ez zuen aukera gehiegirik eduki. Markina-Xemeingo Esku Pilota Taldeko pilotariak lasai jokatu zuen eta gehiago izan zen kantxan 22 eta 6 irabaziz. “Hasierako 9-1 ak markatu zuen partida eta bidea erraztu zion gure pilotariari”, azaldu du Pello Urionabarrenetxea Markina-Xemeingo Esku Pilota Taldeko entrenatzaileak.
Orain dela bi urte Aimar Ibarloza taldekidearekin jokatu zuen kadete mailako finala Agirreamalloak, aurten, baina, eskuko mina zela-eta Ibarlozak ezin izan duela txapelketan parte hartu esan du bien entrenatzailek. Ander Malasetxebarria ere txapelketan aritu dela gogora ekarri du Urionabarrenetxeak. “Partida bi irabazi eta final laurdenetara heldu zen”.
Baque lehiaketako txapela etxean, amateur mailako txapelketa garrantzitsuenetako bat jokatuko du zapatuan, Tolosan, Josu Agirreamalloak: Eskuz binakako Diario Vasco Txapelketa.
Pello Urionabarrenetxea entrenatzailea eta Josu Agirreamalloa pilotaria garaipenaren ostean. Argazkia: Markina-Xemeingo Esku Pilota Taldea
