Nepaleko xarma Markina-Xemeinera ailegatu da
Nepal. Bizitzaren zikloa izenburupean ontzi tibetarrak zer diren, nondik datozen eta nola erabiltzen diren ikasteko aukera egon da gaur [urriak 21] Markina-Xemeinen.
Goizean, 10:00etatik 13:00etara, ontzi tibetarren inguruko tailerra egon da Uhagon kulturgunean. Horretan 15 lagunek parte hartu dute. Tailerra Tato Edroso musikari eta argazkilariak gidatu du. Ontzien inguruko azalpenak entzun ondoren, ikasitakoa praktikan jartzeko aukera eduki dute parte hartzaileek. Horrela, bikoteka antolatuta, ontzien magia lehen pertsonan ezagutu dute.
19:00etan, ostera, Arretxinagako ermita emanaldi berezi baten lekuko bihurtu da. Nepaleko lurrikararen aurreko eta ondorengo argazkiak proiektatzen zituzten bitartean, emanaldi lasaigarri bezain sentikorra eskaini du Edrosok ontzi tibetarrekin, gong eta banbuzko txirulagaz (basuri).
