Usotegi Eguna ospatuko dute Lekeition, auzolana ardatz hartuta

2017/10/25

Lekitto Bedarrak antolatuta, Usotegi Eguna ospatuko dute beste behin ere Lekeition. Zapatuan [urriak 28] egingo dute auzolana oinarri duen jaia, Usotegi parkean. Aurten, gainera, kuadrillen arteko bazkaria ere egingo dute. Lekitto Bedarrekoek azaldu dutenez, urteroko formatua mantendu nahi izan dute. Hala, jaia eginez urte osoan merkatu plazara joaten diren saltzaileak omenduko dituzte. «Sailtzaile horiek gugaz egongo dira, eta bertoko eta sasoiko produktuak eskainiko dizkiete herritarrei».

[EGITARAUA IKUSI]

Horrez gain, Jakoba Errekondok bere azken liburua aurkeztuko du: Landarak lantzen. «Aurkezpenera hurreratzen direnek Errekondori galderak egin eta liburua sinatuta erosteko aukera edukiko dute». Kuadrillei gonbitea. Oro har, jaian urteroko hitzorduak nagusi izango badira ere, aitzur jaurtiketa txapelketan azken bi urteetan txapeldun izan den Kristian Aranzamendiren marka nork hobetuko duen erronka bota dute. Kuadrillen arteko bazkariari dagokionez, antolakuntzak suak eta mahaiak ipiniko dituela aurreratu dute; kuadrilla bakoitzak bere paella egin beharko du. «Herriko kuadrillei bazkarian parte hartzeko gonbitea luzatzen diegu». Horrez guztiaz gain, urtero egin ohi izan duten kalabaza eta gaztaren pisu asmaketa lehiaketa ere egingo dutela aurreratu dute. Eguraldi txarra eginez gero, azoka merkatu plazan egingo litzateke, eta Errekondoren aurkezpena, kultur etxeko Azkue aretoan.

[EGITARAUA IKUSI]

Ostera antzean, ospakizuna arrakastaz egin ahal izatea espero dutela aurreratu dute. Eta urtero modura, taldeko kideek urte osoan Usotegin egindako lana bertatik bertara ezagutu ahalko dute herritarrek. «Herritarrak jaiagaz bat egitera gonbidatzen ditugu. Eskuak zabalik hartuko ditugu denak, eta espero dugu jaia jendetsua izatea». IAZKO ARGAZKI GALERIA: