Berriatuko Udalak garapen prozesuaren emaitzak aurkeztu ditu
Berriatuko Udalak herritarren parte hartzean oinarritzen zen ekintza plana abiarazi zuen iaz. Plan hori egitarakoan, herritarrek alor ezberdinetan zer hobetu, aldatu edo kenduko luketen agertu zuten. Horretan, garapenari lotuta zeuden ekarpenak “asko” izan zirela eta, udalak garapen prozesu bat abiaraztea adostu zuen. Eta orain, udalak garapen prozesuaren emaitzak aurkeztu ditu. Hala, urriaren 29ra arte, herritarrek Goiko Lau elkartearen lokalean dagoen erakusketan ikusi ahal dituzte aipatu emaitzak. Ordutegia: gaur eta bihar, 11:00etatik 13:30era eta 18:00etatik 20:00etara, eta zapatu-domekan 12:00etatik 14:30era.
Lea Artibaiko Garapen Agentziak dinamizatu duen garapen prozesu horretan parte hartu dute baita ere udal ordezkariek eta sektoreetako kideek. “Metodologia parte hartzailea erabili da”.
Argitu dutenez, diagnostiko bat eginez hasi zuten prozesua. Gero, 2030. urterako Berriatuak eduki beharko lukeen garapena adostu zuten. “Amaitzeko, sektorekako ekintza plan bat diseinatuz, garapen hori lortu ahal izateko erronkak eta ekintzak zehaztu genituen”.
Udalak argitu duenez, prozesuak iraun duen bitartean Berriatuak sektoreen oreka oinarri duen garapen jasangarria behar duela ikusi da. “Garapen horrek sektoreen arteko elkarlanean oinarrituta egon behar du, eta herriaren izaera mantenduz, euskaldearen garapenagaz batera egin behar da”.
Prozesuaren emaitzak Goiko Lauren lokalean herritar guztiei erakusteaz batera, emaitza horiek aurkezteko “beste bitarteko batzuk” ere martxan jarri dituztela azaldu dute udal ordezkariek.
Erakusketan, gainera, herritarrek ekarpenak egiteko aukera daukate. Erakusketa amaitzen denean, egindako ekarpenak bildu eta udalaren webgunean argitaratuko ditugu.
Herritarrak eta udal ordezkariak, ‘Berritxu danok einaz’ kanpainako saio batean parte hartzen.
