600 lagunetik gora bildu ditu Bizkaia Kopa Trail-ak Lekeition

2017/11/13

Atzo [azaroak 12] goizean lehiatu zen Lekeition Bizkaia Kopa Trailaren 7. etapa. Euriak atseden eman bazuen ere, basa izan zela eguneko protagonista nabarmendu dute antolatzaileek, “kirolarientzako ibilbidea gogorrago eginez”. 600 lagun baino gehiagok parte hartu zuten.

Kirolariak Lekeitioko plazako irteeran. Argazkia: Lekeitioko Udala

Trail luze eta laburra, mendi bizikleta lasterketa (MTB), txakur-krosa eta mendi martxa luzea zein laburra egon ziren aukeran, eta beti bezala, txakur krosak eragin zuen ikusmin handiena. Danetara 49 andra-gizonek eta euren txakurrek hartu zuten parte, eta Sandra Jimenez Alai txakurragaz eta Andoni Isusi Tysonegaz izan ziren irabazleak. 10 kilometroko trail laburrean Laura Veronica Carrillo atleta bilbotarra eta Julen Larruzea larrabetzuarra izan ziren irabazleak. Eskualdeko kirolariek ere maila ona erakutsi zuten; Maider Vallina lekeitiarra bigarren emakumea izan zen eta Ajangizko Ekaitz Lejarzegi hirugarren gizonezkoa. 20 kilometroko trail luzean, bestalde, Maite Etxezarreta azpeitiarra eta Carlos Rodriguez nagusitu ziren.

Maider Vallina lekeitiarra podiumean. Argazkia: Lekeitioko Udala

MTB probaren ibilbidea izan zen luzeena. Txirrindulariek 21,46 kilometro egin zituzten mendiko bizikletekin. Zuriñe Frutos eta Jose Antonio Garrido izan ziren bizkorrenak. Emakumeetan bigarren eta hirugarren Nagore Elu Arantzamendi ondarrutarra eta Bakarne Oñederra Arando eatarra gelditu ziren. Maila onean ari dira bertokoak. Ondarrutarra eta eatarra lehenengo eta bigarren postuetan doaz sailkapen orokorrean. 3.055 puntu ditu Eluk eta 3.011 Oñederrak. LEKEITIOKO SAILKAPENA: MTBa Neskak