Erroak Loran jaia, zapatuan, Berriatuan

2017/11/22

Beste behin ere, berriatuarrek berriatuarrentzat prestatutako jaia egingo dute zapatuan [azaroak 25] Berriatuan: Erroak Loran. Goikolau kultur elkarteak bultzatutako egunak herritartasuna festa giroan aldarrikatzea du helburu. Urtero legez, herriko musikariek, dantzariek eta abeslariek ere jaian parte hartuko dute. Herriko emakume taldeak deituta udaletxe aurrean elkarretaratzea egin eta gero, berriatuarrak festa giroan murgilduko dira. Izan ere, elkarretaratzea amaitu eta gero, Tarine musika eskolako musikariek kalejira egingo dute. Musikariek herriko dantzariei emango diete lekukoa, eta azken horiek Eliz Abesbatzako abeslariei. Ostean, herritar guztiak Mendibarren frontoian batuko dira inddar jana egiteko.

[zuzenean iazko ARGAZKI GALERIA IKUSI]

[GOIKOLAU SARIA: BERRIATUKO FUTBOL TALDEARENTZAT]

Dena dela, bazkalaurreko ikuskizunek iraun bitartean, herritar batzuk inddarrak prestatzen ariko dira. Izan ere, Erroak Loran zerbait bada herritarrek herritarrentzako prestatutako festa da; ekintza guztietan herritarrak dira protagonista, baita janaria prestatu eta bazkarian zerbitzatzerakoan ere. Bazkarian parte hartuko duten herritar kopuru zehatza aurreratzerik eduki ez badute ere, Goikolauko kideek esan dute iazko antzera batuko direla. Hau da, 250 eta 300 pertsona artean batuko dira bazkaltzen. Bazkalostean ere musika. Bazkalostea ere girotsu joango da. Aurreratu dutenez, erromeria egingo dute. «Iaz herritarrak kantuan egitera animatzeko ekintza egin bagenuen ere, aurten erromeria egitea pentsatu dugu». Erromeria horretan ere herriko musikariak izango dira doinuak aireratuko dituztenak. IAZKO ARGAZKI GALERIA:

Erlazionatutako edukiaARGAZKI GALERIA: Erroak Loran jaia, Berriatuan (2016)