Alejandro Arrieta markinarrak eraman du Lekeitioko San Tomas azokako mahairik onenaren saria

2017/12/21

Eguraldia bezala, eguerdirantz berotzen joan da gaur [abenduak 21] giroa Lekeitioko Santo Tomas Azokan. Ohi modura, 12:00etatik aurrera hasi da jende gehiago hurreratzen Independentzia plazako postuetara, zer zegoen ikusi, dastatu eta erosteko asmoz.

Alejandro Arrieta mahai onenaren saria hartzen Koldo Goitia Lekeitioko alkatea eta Ibon Goitia Landa Garapen Elkarteko teknikariaren eskutik.

Sasoi honetan ohi den legez, indiarrak, karakolak, intxaurrak eta sagarrak eragin dute erosleen interesa. 12 edo 6 eurotan egon da kiloaren batez besteko prezioa, postu batean zein bestean. Danetara, salmenta zuzeneko 36 postu egon dira aurten plazan, eta euretako zazpi izan dira fruta eta ortuari ekoizleenak. Atal horretako aurtengo mahairik onenaren saria, beste urte batez, Xemeingain baserriko Alejandro Arrieta markina-xemeindarrarentzat izan da. Koldo Goitia Lekeitioko alkatearen eskuetatik jaso du saria azokaren amaieran. Ibon Goitia Lea-Artibaiko Landa Garapen Elkarteko teknikariak azaldu duenez, epaimahaiak kontuan eduki duena Alejandro Arrietak erakutsitako produktuen aniztasuna eta kalitatea izan da. “Kontutan hartu dute baita ere postuen estetika eta diseinua”. Faktore horiek guztiak batuta markina-xemeindarrarena izan da puntuaziorik altuena.

[Zuzenean ARGAZKI GALERIA ikusi]

Etxabereak. Ortuariez gain, txerriki, ahate produktu, gazta, gozo, txakolin, olio eta eztia ere egon dira aukeran, eta nekazaritza eta artisautza postuez gainera, Lea-Artibaiko etxabereek ere izan dute lekua azokan. Plazako eskaileren ondoko sokan lotuta egon dira handiak: behi, idi eta zaldiak. Erdirago untxi, oilo, ahuntz eta ardiak. Guztiek eragin dute ikusmina, baina batez ere txerri emeak eta bere txerritxoak. Ikusi, erosi eta zer edo zer hartzeko bilgune ere izan da azoka. AEKren txosnak eta herriko eskoletako postuek ere arrakasta handia eduki dute, ilarak egin dira eguerdian zer edo zer hartu edo taloak erosteko. Lekeitioko Eskolakoak Lekeition ospatuko den Eskola Publikoaren Jairako materiala ere saltzen ibili dira. Gabonetan ere egongo direla kalean esan dute: abenduaren 23, 28, 29, 30, eta urtarrilak 4 eta 5, Eskolapean edo dendan. Abenduaren 31n, plazan.

[Zuzenean ARGAZKI GALERIA ikusi]

Bestalde, elkartasunerako aukera ere egon da. Elikagaien Bankuari laguntzeko euro baten trukean jolas edo ipuinak erosi zitezkeen, eta Donahue sindromea duen Maialen Aulestiaren aldeko postua egon da kamisetak saltzen. Aurten Lekeitioko San Silbestre lasterketa Maialen Aulestiaren alde egingo da, eta kamisetak erostera animatu dute. Preso gaixoak etxera ekartzeko aldarria ere ez da falta izan. Elkarretaratzean bildu dira plazako kioskoaren ondoan.