Markina-Xemeingo Txirrindulari Elkartearen ibilbidea oroituko dute
Markina-Xemeingo Txirrindulari Elkartearen ibilbide osoa gogora ekarriko dute abenduaren 29an, 19:00etan, herriko kultur aretoan egingo den ekitaldian. 40 urte betetzen ditu aurten Markina-Xemeingo Txirrindulari Elkarteak eta ekitaldi “xume bezain polit” bategaz ospatu nahi dute.
Elkarteak jaiotzetik gaur egunera arte egin duen ibilbidea oroitu eta burutu duen lana ikusi ahal izango da ekitaldirako beren-beregi prestatu duten dokumentalaren bidez. Txirrindulari elkartekoek azaldu dutenez, aurretik filmatuta zegoena digitalizatu eta gaur egunera artekoagaz batu dute 40 urteetako errepasoa egiten duen dokumentala osatuz. Egin diren lasterketak bai eta bertatik igaro diren txirrindulari zein urte luze hauetan txirrindularitzaren inguruan lanean jardun duen pertsona oro izango dute gogoan beraz, bideo emanaldi berezian.
Jabi Gorbea Markina-Xemeingo Txirrindulari Elkarteko kideak azaldu duenez Lea-Artibai eskualdeko 500dik gora neska-mutil igaro dira taldetik urte guzti hauetan. “Azken denboraldian 33 gaztetxo izan ditugu eta datorren urtean ere antzeko kopurua egotea espero dugu”.
40 urtetako errepasoagaz amaitzeko, aurten egin diren ekintzak oroitu eta aurrera begirako asmoak ere azalduko dituztela jakitera eman du txirrindulari elkarteko kideak. “Zeintzuk lasterketa egin diren eta taldea nortzuk osatzen dugun ere azalduko dugu”.
Bestalde, federatu nahi duenarentzat, lizentziak ateratzeko bi egun zehaztuko dituztela esan du, eta horren berri ere emango dute ekitaldian. “Bazkide egiteko aukera ere badauka nahi duenak”.
Amaieran 40. urteurrenaren harira atera duten kamiseta aurkeztuko dute, eta luntxa ere egongo da.
HONEKIN LOTUTA: Felix Pertika Markina-Xemeingo Txirrindulari Elkarteko kideari egindako elkarrizketa
Markina-Xemeingo Eskolarteko txirrindulari lasterketa. Argazkia: Jabi Gorbea
