Arretxinagan dagoen Xemeingo udaletxe zaharra konpontzen hasiko da Markina-Xemeingo Udala
Teilatua konpondu, eraikinaren barrua hustu eta inguruko txabola eta eraikinak bota ondoren, Arretxinagan dagoen Xemeingo udaletxe zaharra biziberritzeko lehen faseari ekingo dio orain, Markina-Xemeingo Udalak.
Hastear dagoen fase honetan igogailu bat jarri eta komun berriak egingo dituzte. Horrez gain, iriste erraztasuna bermatzeko beherengo solairuko lurra berdinduko dute. “Kanpotik erabiltzeko moduko komunak izango dira eta ondoan aerotermia berogailu sistema gordeko duen aretoa kokatuko da”.
Udalak jakitera eman duenez, lehen eta bigarren solairuak, berriz, altxatu egin beharko dira maila bat. “Izan ere, herriko musika eskola bertan kokatzea da asmoa, eta hormak hosgabetu egin behar dira”. Eta horretarako beharrezkoa dute altuera gehiago ematea. Eskailera konpondu eta emergentzia irteera bat ere eraikiko dute plataforma baten bidez.
Azaldu dutenez, egitasmo osoaren proiektu guztia eginda dago, eta etenik barik aurrera eraman nahi dituzte faseak, musika eskola datorren ikasturterako bertan martxan egoteko. Hala, lehen fasearen atzetik bigarren faseari ekingo lioke udalak, eta lanak irailerako amaitzea dute asmoa.
Sei gelatan. Lehenengo solairuan kokatuko da musika eskola, eta sei gelatan banatuta egongo da. Beheko solairuan, berriz, beste bi gela egongo dira, sukalde txiki bat eta biltegi bat.
San Migel jaiak antolatzen dituen Arretxinagako Jai Batzordeak ere izango duela bere lekua jakitera eman du udalak, eta beraz, data horretarako lanak amaituta egotea komeni dela nabarmendu dute.
Lehen bi faseak amaituta, hirugarren bat etorriko litzateke. Azken fase horretan gorengo solairuaren konponketa egingo litzateke, baina, oraindik, solairu horren erabilera zehaztu eta zelan egin aztertzen dabiltzala esan dute. “Gela handi bat egitea ere aurreikusten dugu, emanaldietarako, eta mugitu daitezken hormak ere jarri daitezke solairuari erabilera anitz emateko”.
Arretxinaga inguru interesgarria dela dio udalak, ondareari dagokionez, eta udaletxe zaharra animazio motor modura jarrita, plaza, ermita bai eta zubiko mailadia ere, ekimenak antolatzeko gune aproposak izan daitezkeela adierazi dute.
Xemeingo udaletxe zaharra.
