Akerbeltz gaztetxea jende, umore eta bertso onez bete da
Aurreko oholtzatik hasi eta atzeko ateraino bete zen Akerbeltz gaztetxea zapatu [urtarrilak 20] gauean, Hirugarren Mundu Gerraren osteko Bertso Indusketa entzun eta ikusteko. Saioaren aurreko afariko txartel guztiak agortu ziren, eta bakarrik saioa ikustera joan zirenak batu zitzaizkien ondoren. Hala, 150 lagun inguruk gozatu zuten Markina-Xemeingo Gazte Asanbladak antolatutako saio berezia.
Pozik gelditu ziren saioagaz bai antolatzaile zein entzuleak. Bertsolarien lana zein osaketa guztia gustatu zitzaien ikusleei, mozorroak, apaindura bai eta gidoia ere. Saioan sortu zen giro ona eta bertsolarien lana nabarmendu dituzte, ostera, antolatzaileek. “Maila handiko bertsolariak egoten dira eta horrek lana errazten digu”, esan dute.
Saioa. Bonbardaketagaz hasi zen 10. Akerbeltz Bertso Txapelketa, eta oihala altzatutakoan gerra osteko giroan murgildu zen. Guztia hondatuta egonik, gaztetxea zegoen lurren eskaria egin zuten batzuek, eta horiek guztiak deitu zituen oholtzara udaletxeko ordezkariak, bakoitzak bere proposamena aurkeztu eta defendatzeko.
Guztira sei proposamen ezberdin egon zirela jakitera eman zuen, eta horiez gain, gazteena ere egon omen zen, baina baldintzak betetzen ez zituztela eta, kanpoan utzi zituzten.
Horrela, binakako taldeetan, ariketak osatzen hasi ziren hamabi bertsolariak: Josune Aramendi eta Joseba Sololuze (Ekologistak); Ane Labaka eta Nahia Ibarzabal (Racinek); Joseba Artza Urta eta Ander Elortegi (Inuitak); Nerea Ibarzabal eta Lander San Martin (Armagiliek); Eneko Arrate eta Xabat Galletebeitia (Astronautak) eta Aitor Arrizubieta Toko eta Lander Ibarluzea Aitxulua (Zestalarixek).
Ofizioetan lehenengo, bakarkakoan gero, eta jolasetan ere jardun zuten. Batera kantatzeko ariketa, argazkien ariketa, erreleboka, elkarri puntua jartzen, koplatan eta bizkor kantatzen egin behar izan zuten, besteak beste.
Udaletxeko ordezkari eta bertsolariez gainera, beste hiru pertsonai ere izan ziren saioko protagonistak: munduko gerra irabazi zuen Oro Well eta bere robot Silborg eta saio osoa gaztetxearen aztarnen garrantzia azpimarratzen eman zuen Arantza Adi. Hiru horiek testuinguruan kokatzen zuten publikoa.
Astronautak eta Ekologistak ailegatu ziren buruz burukora eta 6ko motza, 9ko motza eta kartelako ariketa eginda Ekologistentzat izan zen garaipena. Beraz, ortu publikoak egiteko egitasmoa zen aurrera egin behar zuena, baina, irabazleak esan eta gero, aguazila atera zen oholtzara eta kanpoan gazte pila bat zegoela esan zuen gaztetxea okupatzeko asmoz, eta hala, gazteek bere egin zuten Akerbeltz.
Ebazpenagaz ados gelditu zen zapatuko saioko publikoa, eta txalo zaparradagaz eskertu zuten bertsolarien eta antolatzaileen lana. Hamargarren urtez, arrakastatsua izan da txapelketa, eta umore eta giro onik ez da falta izan.
Akerbeltz gaztetxeko 10. Bertso txapelketa. Argazkia: Markina-Xemeingo Gazte Asanblada
Josune Aramendi eta Joseba Sololuze Ekologisten egitasmoa defendatzen bertsotan. Argazkia: Markina-Xemeingo Gazte Asanblada
Akerbeltz gaztetxeko 10. Bertso txapelketako bertsolari eta antolatzaileak. Argazkia: Markina-Xemeingo Gazte Asanblada
