Aiora Gojenolak Euskadiko Martxa Txapelketa irabazi du kadete mailan
Emaitza ederrak lortu dituzte Tximista atletismo taldeko atletek asteburuan. Alde batetik, joan den zapatuan Portugaleten lehiatu zen III. Euskadiko Martxa Txapelketa irabazi zuen kadete mailan, Lekeitioko Tximista atletismo taldeko Aiora Gojenola Gorostolak. Azpitxapelduna, berriz, Saioa Telleria Egia Durango Kirol Taldeko atleta markina-xemeindarra izan zen.
Aiora Gojenolak 31 minutu eta 54 segundotan bukatu zuen proba. “Kilometro bateko birak zituen zirkuituak eta Portugaleteko Bizkaia zubiaren azpian kokatuta zegoen zirkuitua, ibilbide polita benetan”, azaldu dute Tximista atletismo taldekoek. Telleriak, berriz, 32 minutu eta 31 segundotan amaitu zuen lasterketa.
Bestalde, Markel Arano natxituarra Zafran (Badajoz) egon da Espainiako Kros Txapelketan. Basauriko Saiatu Javi Conde taldeagaz parte hartu zuen Aranok, norgehiagokan, eta taldeka lehen postua lortu zuten. Bakarka, natxituarrak 18. postua lortu zuen 13 minutu eta 45 segundo eginez.
Datorren asteburuan pista estaliko txapelketekin hasiko direla gazteak jakitera eman dute Tximistakoek.
Aiora Gojenola eta Saioa Telleria Portugaleteko martxan. Argazkia: Tximista
Markel Arano Espainiako Txapelketan. Argazkia: Tximista
