Baso korten garrantziaz hitz egingo du Alberto Santanak Uhagon kulturgunean
Garaian kultur elkarteak antolatuta, Alberto Santanaren hitzaldia egongo da zapatuan [otsailak 3], Uhagon kulturgunean. Historialari eta etnografo bilbotarrak “ezezaguna bezain interesgarria” den gaia jorratuko duela aurreratu dute antolatzaileek: Saroe edo baso-korten esanahia eta hauek gure herrietan izan duten garrantzia. Hitzaldia 18:00etan hasiko da, eta gazteleraz izango da.
“Baso kortak edo Saroeak, udal-mugak eta lurralde-mugak ezarri aurretikoak dira. Lursail bat baino askoz gehiago ziren, ustiapen eskubideak, neurketa arauak eta azken finean, gizarte antolaketa modu bat ziren. Ezezagun hauen sekretuak argituko dizkigu Alberto Santanak hitzaldi honetan”, zehaztu dute antolatzaileek.
Lur eremu garrantzitsuak. Aingeru Zabala historialariak azaltzen duenez, Juan Ramon Iturrizak Bizkaiaren Historia obra ezagunean esaten zuen gure lurraldean, eta, artean bere garaian, XVIII. gizaldiaren azken aldera, korten kopurua mugagabea zela. Gaur egun, berrehun urte beranduago, korta gehienak orduan zeuden tokian irautea litekeela dio Zabalak, baina ia ezezagunak direla.
Zabalak azaltzen duenez kortaz ulertzen zen erdiko harri batez definitzen zuen biribilean itxitako lur eremu bat, normalean larre moduan erabiltzen zena. “Korta mota bi daude, negukoak eta udakoak. Lehenak askotan erreka ondoko alderdietan kokatuta daude, eta bigarrenak, aldiz, mendi hegal garaietan edo mendilerroetako tontor inguruetan”. Mendilerroetako korten artean, Gorbeia , Oizen, Solluben, eta Enkarterriaren alderdi handi batean daudenak aitatzen ditu besteak beste. Korta pribatuen artean, berriz, Zenarruzako korta multzo garrantzitsua aitatzen du.
Oro har Euskal Herriko eta Lea-Artibai inguruetako korten xehetasunak emango ditu Alberto Santanak.
Alberto Santana historialari eta etnografoa.
