Goya saria eskuratu du Saioa Lara markina-xemeindarrak
Handia-n egindako lanagatik Jantzi Diseinu Onenaren Saria eskuratu du markina-xemeindarrak 2018ko Goya sarietan. “Oso urduri nago”, esan zuen Larak agertokira igo bezain pronto. Emozioa azal-azalean zeraman, eta esker oneko berbak eskaini zituen. “Eskerrik asko guztioi! Ezagutzen nauzuen guztiok badakizue oso urduri nagoela, eta lagun bati jaramon eginda, eskerrak emateko testua idatzi dut aurretiaz, badaezpada. Eskerrik asko zuzendariei eta ekoizleei, eta batez ere Anderri (Ander Sistiaga), beste behin ere nigan konfidantza jartzeagatik. Handia-n lan egiteko aukera emanda sekulako oparia egin didazue, eskerrik asko”.
Beragaz batera sail berean hautagiak ziren guztiak zoriondu ostean, saria beragaz batera lan egindakoei eskaini die. “Sari hau nire lankide eta lagun diren guztiekin partekatzen dut. Jugatz, Priscila, Eva, Iratxe, Leire… Hau denona da. Eskerrik asko beti nire aldamenean laguntzen egoteagatik eta ni ulertzeagatik. Hau zuei eta Periseko lantaldeari esker lortu dut. Pertsonaia guztiak janzten eta erraldoia eraikitzen lagundu didazue. Zaila izan da. Eskerrik asko nire gurasoei, hartu ditudan erabaki guztietan babestu nautelako. Eta lan egiteko aukera eman eta honaino ailegatzen lagundu didazuen guztioi”. Azken hitzak, ostera, zinemaren munduan sartzera animatu zuen eta bere lagun mina denari eskaini dizkio. “Batez ere emakume bati eman nahi dizkiot eskerrak, Fina Salegiri: ezagutzen ez nuen bide baten jarri ninduzun, zuk sartu ninduzun guzti honetan, eta begiratu noraino ekarri nauzun. Mila esker bihotzez!”.
Saioa Lara, Goya saria eskuetan duela. Argazkia: ecartelera.
[BIDEOA] IKUSI LARAK SARIA JASO DUEN UNEA
Hamahiru hautagaitzatik hamar Goya lortu ditu Handia-k. Ondokoak izan dira sariak: Jantzi Diseinu Onena (Saioa Lara), Aktore Errebelazio Onenarena (Eneko Sagardoi), Ekoizle Zuzendari Onena (Ander Sistiaga), Musika Originalik Onena (Pascal Gaigne), Gidoi Original Onena (Aitor Arregi, Andoni de Carlos, Jon Garaño eta Jose Mari Goneaga), Efektu Berezi Onenak (Jon Serrano eta David Heras), Argazki Zuzendari Onena (Javier Agirre), Makillaje eta Ile-apaindegi Onena (Ainhoa Eskisabel, Olga Cruz eta Gorka Agirre), Zuzendari Artistikorik Onena (Mikel Serrano) eta Muntaiarik Onena (Laurent Dufreche eta Raul Lopez)
HONEKIN LOTUTA: Sariketa ospatu aurretik Larak HITZAri eskainitako ELKARRIZKETA IRAKURRI
