Zuhaitz eta landarez beteko da zapatuan, Markina-Xemeingo Plazabarripea

2018/02/07

Herriko eta kanpoko landara eta lorezaintza zaleen topalekua izango da, aurten ere, Markina-Xemeingo Plazabarripea. Urtero izaten duen arrakasta ikusita, Zuhaitz, landare eta baserri tresneria azoka antolatu dute beste behin, Markina-Xemeingo Udalak eta Lea-Artibai Landa Garapenerako Alkarteak. Zuhaitz eta landareen hamaika mintegi eta baserri lanabesen saltzaile bat aurkituko dituzte guztira, zapatu goizean [otsailak 10] Zelaiaren goiko parteko gunera hurreratzen direnek. 10:00etan emango zaio hasiera azokari, eta 14:00ak arte egongo da zuhaizka, fruta arbola, sasoiko lore, iratze, kaktus edota landara txikiak ikusi eta erosteko aukera. Aurten ere, Bizkaiko eta Gipuzkoako mintegiak batuko ditu azokak. Hala, Markina-Xemeinen egongo dira Usurbilgo Aranburu mintegia eta Urtinea Lorategia, Iurretako Ortuberri, Igorreko Artadi, Zaldibarko Areitio eta Belar, Gatikako Etxebarria, Zarautzko Lurberry mintegia, Balmasedako Balmaseda Activa, Muruetako Murueta Lorategia eta Bakioko Iturriaga.

Markina-Xemeingo zuhaitz eta landara azoka.

Baserri tresnak eramango ditu azokara, bestalde, Lezamako Aurtenetxek, eta bere ondoan izango ditu landareen munduagaz harreman estua duten beste zenbait produktu ere salgai edukiko dituzten lau artisau: Larrabetzuko Eskulore (Lore sikuak), Lasarteko Ines Flores (Haziak), Karrantzako Samuel Cano (Artisau loreontziak) eta zura lantzen duen Igor Unanue Osoro Araban bizi den eibartarra. Horrez gain, Lea-Artibai eskualdeko eta inguruetako ekoizleen produktuak eskuratzeko parada ere emango du azokak. Denetara, hamabi ekoizle egongo dira euren produktuak eskaintzen:

Ardi gaztadun ekoizle bi: Santamañe (Markina-Xemein) eta Barroeta (Markina-Xemein)
Ahuntz gaztadun ekoizle bat: Larruz gazta (Markina-Xemein)
Sagardo eta txakolin ekoizle bat: Axpe (Markina-Xemein)
Gernikako indaben ekoizlea: Juan Pedro Gallastegi (Elorrio)
Ogigintza eta gozogintzako hiru ekoizle: Mañeko Azpi (Mallabia), Meabeko Ogixe (Markina-Xemein) eta Labegur (Berriatua)
Eztigile bat: Jesus Martinez (Zeanuri)
Ahatekien ekoizle bat: Pates Eskuola (Mungia)
Errioxar jatorri izendapeneko upategi bat: Bodegas Solana de Ramirez (Abalos)
Marmelada ekoizle ekologiko bat: Xabier Alonso Beltzitina (Arabako Ibarrak)

Guzti horregaz gainera, jan eta edaneko postuak ere egongo dira azokan. Horrela, azokazaleek taloa, sagardoa eta txakolina erosi eta dastatzeko aukera edukiko dute.