Larrialdi egoeretarako hodi malguak ipini dituzte Munitibarren

2018/02/13

Bizilagunen eskariari erantzunez, udalerriko zenbait lekutan suhiltzaileek erabiltzeko hodi malguak jarri dituzte. Udaletik azaldu dutenez, auzo bakoitzean luzera desberdinekoak jarri dituzte, ahalik eta etxe gehienetara heldu ahal izateko. Suhiltzaileentzat badira ere, larrialdi egoeretan suhiltzaileak sutea izandako lekura heldu bitartean, auzotarrek ere erabili ahal izango dituzte. Hain zuzen, erabilera egokia bermatzeko ikastaroa emango dute zapatu honetan. Hala, Markina-Xemeingo suhiltzaile etxeko suhiltzaileek hodi malguak zelan erabili erakutsiko diete herritarrei. Horiek auzorik auzo ibiliko dira azalpenak ematen. Uriona auzoan hasiko dira goizean, eta Gerrika, Totorika, Berreño, Aldaka eta Gerrikaitz auzoetan informazioa eman ondoren, herriko plazan amaituko dute ikastaroa. Aldaka auzoan eta herriko plazan hodi malguak dauden armairuak erabiltzeko azalpenekin batera, hodi malguak konektatzeko ur tomen kokapena duen mapa banatuko dute. Auzo bideak. Bestalde, udal ordezkariek herritarrekin egindako auzo batzarretan jasotako beste eskari bat ere bideratu du udalak. Auzo bideetan pilaturiko zuhaitzen adarrak kentzen ari dira egunotan. “Iazko auzo batzarretara bertaratutako herritarrek auzo bideen gainetik dauden zuhaitz adarrak mozteko premia zegoela adierazi zuten”. Bide bazterretik metro bat zabaleran eta 4,5 metro altueran libratuko dituzte. Aldakatik Astorkiganera arteko bidean, Totorikatik Gerrikarako bidean, Gontzugaraitik Gerrikarako bidean eta Gontzugaraitik Urionarainoko bidean ari dira lanean.