Nahia Quinconces Altuna, bere mailara bueltatuta
“Denboraldia oso ondo doa; batez ere iaz lehiatu barik egon eta gero, berriro lehengo martxan nabilelako. Lehengo mailara bueltatzea izugarrizko poztasuna izan da niretzat”. Horrela laburbildu du Nahia Quincoces Altunak bizi duen egoera.
Izan ere, lesio baten ostean entrenatzen hasi eta berriro ere lehian hastea erronka handia izaten da kirolarientzat. Hala, bere mailara bueltatu dela ikusteak asko gogobete du mendexarra. Eta ez da edonola bueltatu, gainera. Egungo Euskal Herriko txapelduna da Quincoces, eta Espainiakoan, azpitxapeldun geratu zen Mireia Miro katalanaren atzetik.
Hain zuzen ere, orain dela bi aste Espainiako Banakako Txapelketa eta Euskal Herriko Txapelketa batera lehiatu zituzten Aragoiko Candanchu eski estazioan. “Euskaldun pilo bat batu ginen, eta izugarrizko giro polita egon zen”, zehaztu du.
Orain dela bi urte min hartu, eta aurreko denboraldi guztian proba bakarrean parte hartu ahal izan zuen: “Denboraldi amaieran izan zen. Baina lehiatzen baino ondo pasatzeko helburuagaz joan nintzen”.
Iazko udan entrenatzen ibili zen, eta, udazkenean, mendiko korrikako lasterketa batzuk egin zituen. Belauna ondo errekuperatuta zeukala ikusi, eta lehiatzeko helburuagaz hasi zen entrenatzen. “Batez ere urritik abendura bitartean egiten ditugu entrenamendurik garrantzitsuenak, eta, azaroan, Alpeetara entrenatzera joateko aukera eduki nuen”.
Hala, lesiotik bueltan, abenduan, Frantziar Pirineoetako Peyragudesn egindako lehen lasterketa irabazi egin zuen. Amets gaiztoa amaitu zenaren seinalea izan zen berarentzat. “‘Etapa bat amaitu da, eta beste bat hasi da’, pentsatu nuen. Ez zait sekula ahaztuko. Ofizialki ez zen proba garrantzitsu bat, baina niretzat oso garrantzitsua zen. Nire burua neurtu nahi nuen, zelan nengoen ikusteko”.
Urtarriletik aurrera izan ditu lasterketa garrantzitsuenak. Frantziako Txapelketa Bertikalean, esaterako, “sentsazio onekin” arituta, bigarren egin zuen. Ostean, Kataluniako Boi Taull eski estazioan lehiatutako Espainiako kronoigoeran eta esprintean parte hartu zuen. Bertikalean edo kronoigoera deitzen den horretan bigarren gelditu, eta esprintean finalean sartu arren, eski bat galdu, eta kanpoan geratu zen.
Munduko Kopako probak. Halaber, Munduko Kopako hiru probatan parte hartu du. Lehenengoa Suitzan izan zen; banakako proban hamaikagarren sailkatu zen, eta hurrengo egunean esprintak zituzten, baina elur jausi arriskuagatik bertan behera utzi zituzten.
Hurrengo asteburuan Andorran egon zen; han ere eguraldi txarragatik banakakoa bertan behera utzi zuten, eta hurrengo egunean, bertikalean, hamahirugarren amaitu zuen. Aurreko asteko eguen eta barikuan, Frantzian, banakakoan hamargarren sailkatu zen, eta bertikalean edo kronoigoeran zazpigarren egin zuen.
Orain arte moduan, aurrerantzean dituen probetarako ere gogotsu ari da entrenatzen. Hilabete honen azken asteburuan Europako Txapelketan egongo da mendexarra. Sizilian, Etna sumendian lehiatuko dute. “Ez nekien han eskiatzen zenik ere. Banaka jokatzen diren hiru probak lehiatuko ditugu: esprinta, bertikala eta banakakoa”.
Horren ondoren, taldekako lasterketekin hasiko direla azaldu du. Grande Course zirkuituan parte hartuko du. Lehen proba Altitoy da, Luz Ardidenen lehiatuko du martxoko lehenengo asteburuan.
“Maila onean berriro egoteagatik oso pozik nago. Min hartuta zaudenean momentu batzuetan esaten duzu, ‘bueltatu ahal izango ote naiz lehengo mailara?’. Berriro eskiatze hutsak izugarrizko poztasuna eman zidan, eta lehiatu ahal izateak, are gehiago. Gainera, kirol honek daukan gauza ona da beti ezberdina dela; eguraldi baldintzek, elur baldintzek asko aldatzen dute. Ni, behintzat, leku berriak ikusteak, mendi berriak igotzeak asko motibatzen nau”.
Gelditzen diren probetan lehenengo hamarren artean geratzea du helburu, bai eta Grande Courseko probak burutzea eta “gustura amaitzea”. Marta Riba katalanagaz egingo ditu: “Orain dela bi urte Pierra Menta beragaz egiteko nintzen, eta Altitoy ere beragaz hasi nuen, eta han hartu nuen min. Ilusio handia daukat horretarako. Arantza hori kentzeko gogoa daukat”.
Otsaileko lehen asteburuan Aragoiko Candanchu eski estazioan lehiatu zituzten Euskal Herriko eta Espainiako Txapelketak.
Martxoaren 14tik 17ra, berriz, mendiko eskiko “Tourra” den Pierra Menta proban egongo da . “Erregina edo lasterketarik garrantzitsuena da”. Binaka egiten den lau etapako proba da. Lau egunetan 10.000 metroko desnibela gainditu beharko dute Areches-Beauforteko bailaran, Frantzian. “Inguruko mendietatik izugarrizko ibilbide politek osatzen dute; oso-oso alpinoa da, pistetatik kanpo dena. Basoetatik gora eta behera, ikusgarria da”. Horretarako ilusioa daukala azpimarratu du. Apirilaren 7an Italian lehiatuko du Munduko Kopa azken proba. Halaber, Grande Courseko beste bitan parte hartuko du. Binaka egiten den hiru etapako Tour du Rutor da bat. PDG edo La Patrouille des Glaciers deritzona da bestea, eta horregaz amaituko du mendi eskiko denboraldia. Suitzako Verdier eski estazio famatuan hasi, eta Zermattan amaitzen da.“Eskiatze hutsak poztasuna eman zidan, eta berriro ere lehiatu ahal izateak, are gehiago”
Quincoces ezkerretik lehenengoa, Espainiako Txapelketaren podiumean.
Begiz jota dituen pobren artean gogorrena zein den galdetuta, Europako Txapelketa aitatu du. Mendiko eskian dabiltzan Europako onenak elkartuko dira bertan, eta denek ere denboraldiko “puntu edo une garrantzitsuenaren moduan»” dutela gaineratu du. “Hori izango da, beharbada, gogorrena, bai eta erronkarik politena ere”. Sumendi baten inguruan eskiatzea esperientzia berria izango da mendexarrarentzat, eta abentura hori bizitzeko desiatzen dago. Teknikoki hobetzea. Gero eta emakume gehiago lehiatzen direla adierazi du. Katalanak, frantziarrak, italiarrak, suediarrak… Maila oso oneko eskiatzaileak daude. Teknikoki hobetu behar dela uste du. Zenbat eta ibilbide teknikoagoa izan, bere denborak besteekiko txarragoak izaten direla dio: “Beharbada, daukadan oztopoa da elurtzatik urrun bizi naizenez, beti ez daukadala entrenatzeko aukerarik. Aurten zortea eduki dut, eta aukera asko eduki ditut entrenatzeko, eta hori igartzen da”. Elurra ez dagoenean eskiatzeko hain erraz edota izotza edo baldintza gogorragoak direnean, denbora gehiago galtzen duela azaldu du. “Horrek esan nahi du teknikan oraindik ere zer hobetu asko daukadala, eta horretan nabil”. Probaz proba, mendirik mendi eta pausoz pauso ibilbide oparoa betetzen ari da Quincoces. Eta bide horretan garaipen garrantzitsuak eskuratu ditu. Esaterako, orain dela bi urte Europako Txapelketan esprintean brontzezko domina eta Munduko?Kopako proba batean zilarrezkoa lortu zituen. “Ez nuen espero, eta bi momentu horiek inoiz ez ditut ahaztuko”. Une gogorrak eta gogoangarriak bizi izan ditu; beti ere, esperientzia berriez gozatzeko gogotsu. Esaterako, orain dela hiru urte parte hartu zuen, lehenengoz, Pierra Mentan. “Proba egin eta amaitze hutsa izugarrizko poztasuna izan zen niretzat. Amets bat bete nuen”.“Geratzen diren probetan lehenengo hamarren artean sartzea da helburua”
