1976ko martxoaren 3an Gasteizen hildako langileak oroituko dituzte Lekeition

2018/02/27

Lekeitioko Marra Gorria Kolektiboak 1976ko martxoaren 3an Gasteizen emandako gertaerak gogoratu eta eraildako langileak omentzeko ekitaldi berezia antolatu du. Abian jarri duten Herri boterea eraiki dinamikaren baitan egingo da omenaldia eguenean [martxoak 1]. Azken urteetan egin duten modura, ekitaldi horren ondoren, maiatzaren 1erako prestatzen ari diren mobilizazioak etorriko direla aurreratu dute. Memoria ariketa huts batetik harantzago, kolektiboaren asmoa zer gertatu zen aztertzea baino, zergatik gertatu zen aztertzea izango dela azaldu dute. “Batez ere, martxoaren 3ko gertaera ilunak eman aurretik, Gasteizko langileriak auto-antolakuntza gaitasuna eta botere maila altu bat lortu zituelako, orduko egoera baldintzatu zein botere paralelo bat eraikitzen joateko indarragaz”.

2017ko omenaldia.

Ildo horretatik, garai hartako gertaerak eta gaur egungo egoeraren arteko lotura egiten dute. “2018. urtean eta kapitalismoaren krisi bete betean, ulertzen dugulako erronka nagusia herri boterearen eraikuntzan dagoela, langile klaseak gidatutako prozesu baten bidez”. Hori dela eta, garai hartan emandako mugimendutik irakaspenak atera nahi dituztela esan dute, Euskal Herrian herri boterean oinarritutako boterea eraikitzea zelan lortu daitekeen ikusteko. Ekitaldia. Antolatu duten oroimen ekitaldiak Alitxu Martinez del Campo militante feministaren hitzaldia izango du oinarri. Alitxu Martinez del Campok 1976ko gertaeretan parte hartu zuen, data horren aurretik ere langile mugimenduaren antolakuntzan eta borroketan parte izan zelarik. “Berak kontatuko digu zelan joan zen egituratzen mugimendua, bai eta zergatik kolpatu zuten errepresiboki hain gogor ere. Horretaz gain, mugimenduan zein gertaeretan emakumeak izan zuen papera ere aztertuko du”. Ekitaldia bideo emanaldiagaz osatuko dute, eta amaieran hausnarketarako tartea ere egongo da. Azken tarte horretan, Marra Gorria Kolektiboak herri boterearen eraikuntzan oinarritutako estrategia politiko baten zertzeladak aurkeztuko dituela aurreratu dute, hausnarketa edota eztabaidarako. Ekitaldia Mozolomendin egingo da 19:00etan, bide batez gune hori okupatu zuteneko bost urte betetzen direla ere ospatzeko.