Lea-Artibai eta Mutrikuko 235 emakumek parte hartuko dute Lilatoian
29. Lilatoia egingo da domekan [martxoak 4] Donostian, eta horretan parte hartuko dute Lea-Artibai eta Mutrikuko 235 emakumek. Ondarrutarrak dira gehienak (93), atzetik datoz markina-xemeindarrak (58), mutrikuarrak (46) eta lekeitiarrak (19). Ondoko herrietatik ere joango dira: Berriatua (8), Aulesti (1), Etxebarria (1), Ispaster (1), Mendexa (2), Munitibar (5) eta Ziortza-Bolibar (1).
HITZA taldea. Aurreko urteetan modura, aurten ere HITZA taldea egongo da lasterketan; 100 emakumek osatuko dute taldea. Elkarlanean osatutako taldea da, eta ondoko tokian tokiko HITZA egunkariek parte hartzen dute: Oarso Bidasoko HITZA, Lea-Artibai, Mutriku eta Busturialdeko HITZA, Goierriko HITZA, Urola Kostako HITZA eta Irutxuloko HITZAa. Guztiek kamiseta bera jantziko dute, kolore berdekoa. Hitzez hitz, pausoz pauso. Bidea egiten ari gara leloa eramango dute soinean.
Lasterketa 10:30ean hasiko da, Boulevardetik. Kontsigna zerbitzua Gipuzkoa plazan egongo da, 09:00etatik 12:00etara; uzten diren poltsetan edo motxiletan sobre barruko etiketa ipinita eraman beharko da. “Balio handiko objeturik ez uztea gomendatzen da”.
EGITARAUA:
- 09:20: HITZA taldearen argazkia, Maria Kristina hotelaren aurrean.
- 09:40etan, AERO-ZUMBA beroketa, Boulevardean.
- 10:00etan BEGISARErekin argazki erraldoia.
- 10:30etan, lasterketaren hasiera (5Km).
- 10:00etatik 15:00etara, Kontxako kabinetan dutxa hartzeko aukera (Hotel Londres-en parean).
- 11:30etan sari banaketa, Alderdi Ederren. Sariak maila bakoitzeko lehen hirurei emango zaizkie, helmugara-iriste hurrenkeraren arabera (denbora ofiziala) sarituko dira, baita hiru talde jendetsuenak ere.
- Boulevard-an masaje zerbitzua egongo da.
