Wargame ikastaroa egingo dute Lekeition
Lekittoko Rol Elkarteak antolatuta, Wargame ikastaroa martxoaren 12tik 16ra egingo da. Saioak 17:00etatik 19:00etara egingo dira, kultur etxeko Klik gelan. Ikastaroa doakoa da, eta elkarteko kideek interesa eduki ahal duten herritar guztiak gonbidatu nahi izan dituzte.
Ikastaroan parte hartzeko aldez aurretik izena ematea eskertuko luketela esan dute. “Dena dela, martxoaren 12an izena eman ez duen baten bat agertzen bada ere ongietorria izango da”.
Ikastaroan Wargame jolasean jolasteko behar diren miniaturak margotu, horiekin jolasteko maketa prestatu eta nola jolasten den irakatsiko dute elkarteko kideek; hiru fase horiek landuko dituzte. “Ez da ezer teknikoa izango. Beraz, orain arte mundu honetan barneratu ez direnak ere etorri ahal dira”.
“Guk nahi duguna da jende gehiago sartzea taldean. Horrela, etorkizunean txapelketak egin ahal ditugu”. Izan ere, momentuz hiru lagun baino ez dira. “Mundu hau ezagutu nahi duten guztiak gonbidatuta daude!”.
Taldeko kideekin harremanetan jarri nahi dutenek telefonoz deitu (646 30 55 17) edo posta elektronikoa ere idatzi ahal dute (warhammerlekitxo@gmail.com). Taldeak, gainera, blog bat ere badauka.
Argazkia: Warharmmerlekitxo.blogspot.es
