Lekeitioko I. Bodyboard Txapelketa lehiatuko dute, zapatuan
Karraspio hondartzan jokatuko dute, 10:00etan hasita. Hala ere, parte hartzaileentzat 09:00etan jarri dute ordua. Ordu horretatik aurrera izena eman ahalko da, baina aurrez izena eman daiteke artzabalsurfelkartea@gmail. com posta elektronikora mezua bidalita.
Bi kategoria egongo dira: sub 16 (16 urtez azpikoena) eta open. Bateko zein besteko irabazleak txapela eta aletak jasoko ditu. Bigarren sailkatuek mugikorrerako babes-zorroak irabaziko dituzte, eta hirugarrenek kamiseta eta eskarpinak.
Momentuz 25 pertsonak izena eman dute, eta antolatzaileek eskualdeko zein kanpoko surflariak parte hartzera animatu dituzte. Kirol polita dela, eta txapelketa herrikoia izango denez, batik bat gaztetxoei lotsak edota aurreiritziak albo batera utzi, eta Karraspiora bertaratzeko gonbita luzatu diete.
Lekeitioko Artzabal Surf Elkarteak antolatu du txapelketa, Lekeitioko eta Mendexako udalen eta Dzinguaren laguntzagaz. Surf elkarteko kideek azaldu dutenez, herrian bodyboard mailan dagoen harrobia ikusita erabaki dute txapelketa antolatzea. Urtero Surf Eguna ospatzen dute, irailean. Taldeko kideak jai giroan elkartzen dira, eta surf ikastaroak eta bestelako ekintzan egiten dituzte, musikagaz girotuta. Hala, txapelketa lehenengoz antolatuta, beste pauso bat eman dute oraingo honetan.
Jarraipena izatea da euren asmoa. Hau da, urtero antolatu nahi dute txapelketa: “Agian txandakatzen joango gara, eta datorren urtean bodyboard txapelketa egin ordez, surf txapelketa izango da; urte bakoitzean mota batekoa. Baina, oraindik ez dugu ezer zehaztu, aztertu egin behar dugu”.
Borja Basterretxea II. Arrigorri Bodyboard txapelketan.
